માળિયા (મી)માં કારની સર્વિસ કરાવવા ગયેલા યુવાનની બે શખ્સોએ ધારિયા-ધોકા વડે સર્વિસ કરી નાખી !: બંને આરોપીની ધરપકડ
SHARE
JOIN OUR GROUP
માળિયા (મી)માં કારની સર્વિસ કરાવવા ગયેલા યુવાનની બે શખ્સોએ ધારિયા-ધોકા વડે સર્વિસ કરી નાખી !: બંને આરોપીની ધરપકડ
માળિયા કચ્છ હાઇવે રોડ ઉપર આવેલ વિશાલા હોટલના ગ્રાઉન્ડમાં યુવાન પોતાની ગાડીની સર્વિસ કરાવી રહ્યો હતો દરમિયાન બે શખ્સો ત્યાં ધારિયા અને ધોકા સાથે આવ્યા હતા અને કોઈ પણ વાંક વગર યુવાન ઉપર હુમલો કર્યો હતો અને તેને હાથે, પગે તથા વાંસાના ભાગે માર મારીને ઈજા કરી હતી તેમજ જાનથી મારી નાખવાની ધમકી આપી હતી અને તેની કારનો કાચ તોડી નાખવામાં આવ્યો હતો જેથી ભોગ બનેલા યુવાને સારવાર લીધા બાદ માળિયા તાલુકા પોલીસ સ્ટેશન ખાતે બે શખ્સોની સામે ફરિયાદ નોંધાવતા પોલીસે ગુનો નોંધી આરોપીઓને પકડવા માટે તજવીજ શરૂ કરી છે
જાણવા મળતી માહિતી પ્રમાણે માળિયા તાલુકાના ચીખલી ગામે રહેતા સલીમભાઈ કરીમભાઈ કટિયા (42)એ માળિયા તાલુકા પોલીસ સ્ટેશન ખાતે સાહિલ રમણભાઈ મોવર અને મોસીન નુરાલીભાઈ મોવર રહે. બંને માળીયા મીયાણા વાળાની સામે ફરિયાદ નોંધાવેલ છે જેમાં તેને જણાવ્યુ છે કે, માળિયા કચ્છ હાઇવે રોડ ઉપર આવેલ વિશાલા હોટલના ગ્રાઉન્ડમાં ફરિયાદી પોતાની કાર નંબર જીજે 13 સીસી 4307 લઈને ગયો હતો અને તેની ગાડીને સર્વિસ કરાવતો હતો દરમિયાન બંને આરોપી ત્યાં આવ્યા હતા અને કોઈપણ કારણ વગર બંને આરોપીઓ ધારિયા અને ધોકા વડે ફરિયાદીને હાથે, પગે અને વાસાના ભાગે મારમારીને ફ્રેક્ચર જેવી ઇજા કરી હતી તેમજ તેને જાનથી મારી નાખવાની ધમકી આપી હતી અને ફરિયાદીની ગાડીનો કાચને પણ તોડી નાખવામાં આવ્યો હતો જેથી ભોગ બનેલા યુવાને સારવાર લીધા બાદ માળિયા તાલુકા પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધીને બંને આરોપી સાહિલ રમણભાઈ મોવર અને મોસીન નુરાલીભાઈ મોવર રહે. બંને માળીયા મીયાણા વાળાની ધરપકડ કરી આગળની કાર્યવાહી હાથ ધરી છે.
