ટંકારાના ઓટાળા ગામે ઝઘડાનું સમાધાન કરવા સમજાવવા ગયેલા સરપંચને ગાળો આપીને મારી નાખવાની ધમકી

ટંકારાના ઓટાળા ગામના સરપંચ તેના ગામમાં રહેતા યુવાને અગાઉ ઝઘડો થયો હતો જેના સમાધાન બાબતે સમજાવવા માટે ગયા હતા ત્યારે ફરિયાદ કરનાર યુવાનના કૌટુંબિક ભાઈ દ્વારા સરપંચને જાતિ પ્રત્યે અપમાનિત કરીને જેમ ફાવે તેમ ગાળો આપવામાં આવી હતી અને જાનથી મારી નાખવાની ધમકી આપવામાં આવી હતી જેથી ભોગ બનેલ સરપંચ દ્વારા ટંકારા તાલુકા પોલીસ સ્ટેશન ખાતે ફરિયાદ નોંધાવવામાં આવી છે.

જાણવા મળતી માહિતી પ્રમાણે ટંકારા તાલુકાના ઓટાળા ગામના સરપંચ સુરેશભાઈ નથુભાઈ પરમાર (35)એ હાલમાં ટંકારા તાલુકા પોલીસ સ્ટેશન ખાતે અલ્પેશભાઈ ગોરધનભાઈ ઘોડાસરા રહે. ઓટાળા વાળાની સામે ફરિયાદ નોંધાવેલ છે જેમાં તેને જણાવ્યું છે કે, ઓટાળા ગામની સીમમાં નિકુલભાઈ નરભેરામભાઈ તથા વાછકપર ગામના રોહિતભાઈ નાનજીભાઈ ફાંગલિયાને જમીનના રસ્તા બાબતે ઝઘડો થયેલ હતો અને નિકુલભાઇને ફરિયાદી ગામના સરપંચ હોવાથી સમાધાન માટે સમજાવવા માટે ગયા હતા ત્યારે આરોપી અલ્પેશભાઈ નિકુલભાઈનો કૌટુંબિક ભાઈ હોય તેને સારું નહીં લાગતા તેને ફરિયાદીને જ્ઞાતિ પ્રત્યે અપમાનિત કરીને જેમ ફાવે તેમ ગાળો આપી હતી અને જાનથી મારી નાખવાની ધમકી આપી હતી જેથી ભોગ બનેલ સરપંચે નોંધાવેલ ફરિયાદ આધારે પોલીસે હાલમાં એટ્રોસિટી સહિતની કલમ હેઠળ ગુનો નોંધીને આરોપીને પકડવા માટે શરૂ કરી છે. અને આ બનાવની તપાસ ડીવાયએસપી ચલાવી રહ્યા છે.

બે બોટલ દારૂ

મોરબીના વીસીપરામાં આવેલ અમરેલી રોડ ઉપર નળિયાના કારખાનાની બાજુમાંથી પસાર થઇ રહેલા શખ્સોને રોકીને પોલીસે ચેક કર્યા હતા ત્યારે બે શખ્સ પાસેથી દારૂની બે બોટલ મળી આવતા પોલીસે 800 રૂપિયાની કિંમતની દારૂની બોટલો કબજે કરી હતી અને આરોપી મનોજભાઈ જયંતીભાઈ આધરોજિયા (20) રહે.  ઇન્દિરાનગર ખોડીયાર માતાજીના મંદિર પાસે મોરબી અને અનિલભાઈ તુલસીભાઈ દલસાણીયા (19) રહે. મદીના સોસાયટી અમરેલી રોડ મોરબી વાળાની ધરપકડ કરી હતી અને તેની સામે બી ડિવિઝન પોલીસ સ્ટેશન ખાતે ગુનો નોંધી પોલીસ આગળની કાર્યવાહી હાથ ધરી છે.