મોરબીના લાલપર ગામે જુદાજુદા ટ્રકમાંથી છ બેટરીની ચોરી કરનાર આરોપીની ધરપકડ

મોરબીના લાલપર ગામે ગૌશાળાના ગેટની સામેની શેરીમાં રહેતા યુવાનના ઘર પાસે પાર્ક કરેલા ટ્રકમાંથી બેટરીની ચોરી કરવામાં આવી હતી તેમજ અન્ય ત્રણ વ્યક્તિઓના ટ્રકમાંથી બેટરીની ચોરી થઈ હતી જેથી કરીને કુલ મળીને છ બેટરીની ચોરી કરવામાં આવી હોય યુવાને ફરિયાદ નોંધાવતા પોલીસે આરોપીની ધરપકડ કરી આગળની રાબેતા મુજબની કાર્યવાહી હાથ ધરેલ છે

બનાવની જાણવા મળતી માહિતી મુજબ મોરબી તાલુકાના લાલપર ગામે ગૌશાળાના ગેટ પાસે રહેતા અને ટ્રાન્સપોર્ટનો ધંધો કરતા યાસીનભાઈ ઈકબાલભાઈ દલ જાતે સંધિ (૩૬) એ મોરબી તાલુકા પોલીસ સ્ટેશન ખાતે મનીષભાઈ જયકિશનભાઇ પ્રજાપતિ રહે. રણછોડ નગર મોરબી વાળાની સામે ચોરીની ફરિયાદ નોંધાવી હતી જેમાં તેને જણાવ્યું છે કે, ફરિયાદીએ પોતાના ઘર પાસે ટ્રક નંબર જીજે ૩ એઝેડ ૭૨૮૭ પાર્ક કરીને મૂક્યો હતો જે ટ્રકમાંથી ૫૦૦૦ રૂપિયાની કિંમતની બેટરીની આરોપી દ્વારા ચોરી કરવામાં આવી હતી તેમજ અન્ય ત્રણ ટ્રકમાંથી પણ પાંચ બેટરીઓની ચોરી કરવામાં આવી હોય કુલ મળીને ૩૦ હજાર રૂપિયાની કિંમતની છ બેટરીની ચોરી કરવામાં આવી હતી જેથી ભોગ બનેલા યુવાન દ્વારા નોંધવામાં આવેલ ફરિયાદ આધારે પોલીસે આરોપી મનીષભાઈ જયકિશનભાઇ પ્રજાપતિ રહે. રણછોડનગર મોરબી વાળાની ધરપકડ કરી આગળની રાબેતા મુજબની કાર્યવાહી હાથ ધરી છે