મોરબીમાં આરએસએસના સ્વયંસેવકોના ઘરે 133 દીકરીઓનું કરાયું કન્યાપૂજન

નવરાત્રી પર્વ નિમિત્તે સામાજિક સમરસતા, સમાનતા અને બંધુત્વનો અદભુત સંદેશ આપવા માટે પ્રેરણાદાયી કાર્યક્રમ મોરબીમાં યોજાયો હતો જેમાં ડો. હેડગેવાર સ્મારક સમિતિ (રાજકોટ) અને સામાજિક સમરસતા મંચ (મોરબી) ના હોદેદારો દ્વારા નવરાત્રીના પ્રથમ નોરતે દીકરીઓનું પુજન કરવામાં આવ્યું હતું.

મોરબીના આરએસએસના 35 જેટલા સ્વયંસેવકોના પરિવારો દ્વારા અનુસૂચિત જાતિ (હિન્દુ સમાજ) ની 133 દીકરીઓનું પોતાના ઘરે આમંત્રિત કરવામાં આવી હતી અને પરિવારના સભ્યોની જેમ જ દીકરીઓને આવકારીને વડીલો દ્વારા તેઓનું માતૃશક્તિ સ્વરૂપે કન્યા પૂજન કરવામાં આવ્યું હતું. ત્યારબાદ તમામ દીકરીઓને ભક્તિભાવપૂર્વક લ્હાણી (ભેટ) અર્પણ કરી સ્નેહભોજન કરાવવામાં આવ્યું હતું. ખાસ કરીને સમાજના તમામ વર્ગો વચ્ચે સમરસતા સ્થપાય અને આત્મીય સંબંધો ગાઢ બને તેવી ભાવના સાથે આ કાર્યક્રમ કરવામાં આવેલ હતો. આ સમગ્ર આયોજનને સફળ બનાવવા ડો. હેડગેવાર સ્મારક સમિતિ રાજકોટની મોરબી શાખા, સામાજિક સમરસતા મંચ અને આરએસએસના કાર્યકર્તાઓ તથા તેમના પરિવારજનોએ ભારે જહેમત ઉઠાવી હતી.