મોરબી: મગફળીના ગોડાઉનમાં લાગેલી આગ 9 દિવસ કાબુમાં આવી !: આગ લાગવાનુ કારણ હજુ પણ અકબંધ

મોરબીના રફાળેશ્વર ગામ પાસે મગફળીના ગોડાઉનમાં એક સપ્તાહ પહેલા આગ લાગી હતી જેને કાબૂમાં કરવા માટે તાત્કાલિક ફાયરની ટીમને બોલાવવામાં આવી હતી જો કે, ગોડાઉનમાં લાગેલી આગને કાબુમાં લેતા 9 દિવસ જેટલો સમય લાગ્યો હતો અને હાલમાં સ્થળ ઉપર બળેલી મગફળી હટાવવામાં આવી છે અને આખા ગોડાઉનને તોડી પાડવામાં આવેલ છે જો કે, આગ લાગવાનુ કારણ હજુ પણ અકબંધ છે.

મોરબીના રફાળેશ્વર ગામ પાસે મેજિક સિરામિકના ગોડાઉનમાં નાફેડ દ્વારા ખરીદી કરવામાં આવેલ મગફળીના જથ્થાને મૂકવામાં આવેલ હતો તે મગફળીના જથ્થામાં શનિવારે તા. 4/7/26 ના રોજ બપોરે દોઢ વાગ્યાના અરસામાં આગ લાગવાની ઘટના બની હતી જેની મોરબી મહાપાલિકાના ફાયર વિભાગને જાણ કરવામાં આવી હતી ત્યાર બાદ આગ વિકરાળ હોવાથી મેજર કોલ જાહેર કરીને મોરબી ઉપરાંત રાજકોટ, જામનગર અને વાંકાનેરથી ફાયર ફાઇટરોને બોલાવવામાં આવ્યા હતા.

આ આગને સો ટકા કાબૂમાં લેતા ફાયરની જુદીજુદી ટીમોને 9 દિવસ જેટલો સમય લાગ્યો હતો. અને જેમ જેમ મગફળીની જીઆઇ ગુણી હટાવવામાં આવે તેમ તેમ નીચેના ભાગમાંથી આગ બહાર આવતી હતી જેથી ફાયરના વાહનોને સ્થળ ઉપર રાખીને 9 દિવસ સુધી આગ ઉપર સતત પાણીનો મારો કરવામાં આવેલ હતો ત્યારે આગ કાબુમાં આવેલ છે. ઉલેખનીય છે કે, આ ગોડાઉનમાં ટેકાના ભાવે ખરીદી કરેલ મગફળીની 35 કિલો વજનની એક એવી કુલ મળીને 1,59,581 ગુણી મૂકવામાં આવી હતી જેની કુલ કિંમત 44,46,31,899 રૂપિયા થતી હતી જો કે, ગોડાઉનમાં આગ લાગવાથી કરોડો રૂપિયાની મગફળી બળીને ખાખ થઈ ગયેલ છે આટલું જ નહીં પરંતુ કારખાનાનો શેડ પણ તૂટી ગયો છે જો કે, આ બનાવની તાલુકા પોલીસ સ્ટેશન ખાતે નોંધ કરીને તાલુકા પીઆઇ પીઆઈ એન.એસ.ઘેટીયા અને તેની ટિમ દ્વારા આગળની તપાસ કરવામાં આવી રહી છે પરંતુ 9 દિવસ પછી પણ આગ લાગવાનુ કારણ આજની તારીખે પણ અકબંધ છે.