મોરબીમાં ઘર પાસે બેઠેલા યુવાનને એક શખ્સે માથામાં પથ્થરનો ઘા ઝીકયો: સીસીટીવી વિડીયો થયો વાયરલ

મોરબીના યોગીનગર વિસ્તારમાં યુવાન પોતાના ઘર પાસે બેઠો હતો ત્યારે તે યુવાનને એક શખ્સ દ્વારા માથાના ભાગે પથ્થરનો ઘા મારવામાં આવ્યો હતો જે સમગ્ર ઘટના સીસીટીવી કેમેરામાં કેદ થયેલ હોય તેનો વિડીયો સોશિયલ મીડિયામાં વાયરલ થઈ રહ્યો છે

મોરબીમાં કુબેર ટોકીઝ પાસે આવેલ યોગીનગર વિસ્તારમાં રહેતા ભાવેશભાઈ રતિભાઈ અગેચાણીયા (25) નામનો યુવાન પોતાના ઘર પાસે ખુરશી રાખીને બેઠો હતો ત્યારે ત્યાં લારી પાસે ઉભેલા શખ્સો પૈકીના એક શખ્સ દ્વારા પોતાના હાથમાં જમીન ઉપર પડેલ પથ્થર ઉપાડીને ભાવેશભાઇને માથાના ભાગે પથ્થર માર્યો હતો જેથી ભાવેશભાઈને માથાના ભાગે ગંભીર ઇજા થઈ હોવાના કારણે તેને તાત્કાલિક સારવાર માટે હોસ્પિટલ લઈ ગયા હતા અને આ બનાવ અંગેની હોસ્પિટલ મારફતે બી ડિવિઝન પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી. જોકે યુવાનને ક્યાં કરણસર પથ્થર મારવામાં આવ્યો તે અંગેની વિગત હજુ સુધી સામે આવી શકી નથી.

અત્રે ઉલ્લેખનીય છે કે, થોડા દિવસો પહેલા મોરબીના સનાળા રોડ ઉપર નજીવી વાતમાં યુવાનને છરીના ઘા મારીને તેની હત્યા કરવામાં આવી હતી અને આ બનાવમાં બે સગીરને હસ્તગત કરીને પોલીસે કાર્યવાહી કરેલ છે તેવામાં પોતાના ઘર પાસે ખુરશી ઉપર બેઠેલા યુવાનને પથ્થરનો ઘા મરવામાં આવેલ છે તેનો વિડીયો સામે આવ્યો છે તે જોતાં મોરબીમાં દિવસે અને દિવસે ગંભીર ગુનાઓનું પ્રમાણ મોરબીમાં વધતું હોય તે પ્રકારનો ઘાટ જોવા મળી રહ્યો છે.