ટંકારાના મીતાણા પાસે ઓવરબ્રિજ ઉપર ટ્રક ચાલકે ટ્રેક્ટરને ટક્કર મારતા સર્જાયેલ અકસ્માતમાં કાકાની નજર સામે ભત્રીજાનું મોત

ટંકારા રાજકોટ હાઇવે રોડે મીતાણાના ઓવરબ્રિજ ઉપરથી ટ્રેક્ટર પસાર થઈ રહ્યું હતું ત્યારે ટ્રક ચાલકે ટ્રેક્ટરને હડફેટે લેતા અકસ્માતનો બનાવ બન્યો હતો જે બનાવમાં ટ્રેક્ટર ચાલક યુવાનનું ઇજા થયેલ હોવાથી મોત નીપજ્યું હતું અને ટ્રેક્ટરમાં બેઠેલા મૃતક યુવાનના કાકાને ઇજાઓ થયેલ છે જેથી તેઓને સારવારમાં ખસેડાયા હતા અને તેઓને નોંધાવેલ ફરિયાદ આધારે પોલીસે ટ્રક ચાલકની સામે ગુનો નોંધી આરોપીને પકડવા માટે તજવીજ શરૂ કરેલ છે

જણાવ મળતી માહિતી પ્રમાણે ટંકારા તાલુકાના મીતાણા ગામે પ્રભુનગરમાં રહેતા અરવિંદભાઈ મોહનભાઈ દેવડા (47)એ હાલમાં ટ્રક નંબર જીજે 8 એડબલ્યુ 5303 ના ચાલક સામે ટંકારા તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે, ટંકારા થી રાજકોટ તરફ જવાના રસ્તા ઉપર મીતાણા ઓવરબ્રિજ ઉપરથી તેઓ પોતાના ભત્રીજા કિશોરભાઈ ધનજીભાઈ દેવડાના ટ્રેક્ટર નંબર જીજે 3 ઇએ 4738 માં બેસીને જઈ રહ્યા હતા દરમિયાન ટ્રક ચાલકે પોતાનું વાહન બેફિકરાઈથી ચલાવીને ટ્રેક્ટરની ટ્રોલીમાં તેનો ટ્રક અથડાવ્યો હતો જે બનાવમાં ફરિયાદી અરવિંદભાઈને પગ, દાઢી, કપાળ, મણકા અને ફેફસામાં ઇજાઓ થયેલ હતી જેથી તેને સારવારમાં લઈ ગયા હતા અને ટ્રેક્ટર ચાલક કિશોરભાઈ ધનજીભાઈ દેવડા રહે. પ્રભુનગર મીતાણા વાળાને ગંભીર ઇજાઓ થઈ હોવાના કારણે તેનું મોત નીપજયું હતું જે બનાવ બાદ આરોપી પોતાના હવાલા વાળો ટ્રક લઈને સ્થળ ઉપરથી નાસી ગયો હતો જેથી આ બનાવ સંદર્ભે મૃતક યુવાનના કાકાએ નોંધાવેલ ફરિયાદ આધારે પોલીસે હાલમાં ટ્રકચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

વરલી જુગાર

હળવદના ભવાનીનગર સામે ઓમ ટાયર વાળા કોમ્પ્લેક્સની બાજુમાં જાહેરમાં વરલી જુગારની રેડ કરવામાં આવી હતી ત્યારે સ્થળ ઉપરથી વરલી જુગારના આંકડા લેતા અકબરભાઈ ઉર્ફે હકાભાઇ વલીભાઈ કટીયા (48) રહે. ભવાનીનગર ઢોરો દેવીપુજક વાસ પાસે હળવદ વાળાની ધરપકડ કરી હતી અને તેની પાસેથી રોકડા 720 રૂપિયા કબ્જે કરવામાં આવ્યા હતા અને તેની પ્રાથમિક પૂછપરછમાં રવિભાઈ ભુરાભાઈ રબારી રહે. ભવાનીનગર ઢોરો તાલુકો હળવદ વાળાનું નામ સામે આવ્યું હતું જેથી બંને સામે હળવદ તાલુકા પોલીસ સ્ટેશન ખાતે ગુનો નોંધી બીજા આરોપીને પકડવા માટે તજવીજ શરૂ કરેલ છે