મોરબીના મહારાણા પ્રતાપ સર્કલ પાસે સર્વિસ રોડના ખાડા જીવલેણ સાબિત થાય તે પહેલા બુરવા માટે સ્થાનિકોની માંગ

મોરબીમાં મહારાણા પ્રતાપ સર્કલ પાસે ઓવરબ્રિજ બનાવવા માટેની કામગીરી ચાલી રહી છે ત્યાં રસ્તાની બંને બાજુએ સર્વિસ રોડ આપવામાં આવ્યા છે જોકે સર્વિસ રોડ ઉપર ઠેર ઠેર ખાડા હોવાના કારણે તેમાં ચોમાસાનું વરસાદી પાણી ભરાઈ જાય છે જેના કારણે અવારનવાર નાના મોટા અકસ્માતો થતા હોય છે જેના કારણે નિર્દોષ લોકોને ઈજાઓ થતી હોય છે ત્યારે આ ખાડાના કારણે ભવિષ્યમાં કોઈ જીવલેણ અકસ્માત થાય તે પહેલા રોડ ઉપરના ખાડા બુરવામાં આવે તેવી સ્થાનિક વેપારીઓ સહિતના લોકો દ્વારા માંગ કરવામાં આવી છે

મોરબી શહેરના સામાકાંઠા વિસ્તારમાં મહારાણા પ્રતાપ સર્કલ પાસે હાલમાં ઓવરબ્રિજના પીલર ઊભા કરવા માટેની કામગીરી ચાલી રહી છે અને કોન્ટ્રાક્ટર દ્વારા રોડની બંને બાજુએ સર્વિસ રોડ બનાવવામાં આવેલ છે જો કે, ત્યાં ખાડા પડી ગયા છે તેને રીપેર કરવા માટેની તસ્દી લેવામાં આવતી નથી અને ખાડામાં વરસાદનું પાણી ભરાઈ રહેતું હોય અવારનવાર નાના-મોટા અકસ્માતો સર્જાતા હોય છે દરમિયાન મંગળવારે સવારના સમયે ડબલ સવારી એકટીવા લઈને બે મહિલા ત્યાંથી પસાર થઈ રહી હતી ત્યારે ખાડામાં ભરાયેલ પાણીના કારણે એકટીવા સ્લીપ થયું હતું અને બંને મહિલા પાણી ભરેલા ખાડામાં પડી હતી. ત્યારબાદ આ જ સ્થળ ઉપરથી પસાર થઈ રહેલ માલ વાહક રીક્ષા રસ્તામાં આવેલા ખાડામાં ભરાયેલ પાણીના કારણે પલટી મારી ગઈ હતી જેથી અકસ્માત થયો હતો આમ રોડ ઉપરના ખાડા નિર્દોષ વાહન ચાલકો કે અન્ય લોકો માટે જીવલેણ સાબિત થાય તેવી શક્યતા હોવાથી જવાબદાર અધિકારી દ્વારા બેદરકાર કોન્ટ્રાક્ટરની સામે પગલાં લેવામાં આવે અને ઓવરબ્રિજની બંને બાજુએ આપવામાં આવેલ સર્વિસ રોડના ખાડા વહેલી તકે બુરવામાં આવે અને આવી જ રીતે શહેરના જુદાજુદા વિસ્તારમાં કોઈપણ રોડ ઉપર ખાડા હોય તો તેને બુરવામાં આવે તે જરૂરી છે નહીં તો ચોમાસામાં રોડમાં પડેલા ખાડાઓના કારણે નિર્દોષ લોકોના હાથ પગ ભાંગે અથવા તો જીવ જાય તો તેના માટે જવાબદાર કોણ તે પહેલાથી જ અધિકારીઓને નક્કી કરી લેવું જોઈએ નહિ તો પછી વર્ષો સુધી સીટ દ્વારા તપાસ કરવામાં આવે અને પછી કોઇની સામે કોઈ કાર્યવાહી ન થાય તેવો ઘર સર્જાશે.