મોરબીના ખાટકીવાસમાં એક જ ફળિયામાં રહેતા એક જ કુટુંબના લોકો વચ્ચે મકાનની ડેલી બંધ કરવા બઘડાટી: મહિલા સહિત 5 સામે ફરિયાદ

મોરબીના ખાટકીવાસ વિસ્તારમાં એક જ ફળિયામાં રહેતા એક જ પરિવારના લોકો વચ્ચે મકાનની ડેલી બંધ કરવા બાબતે અવારનવાર ઝઘડો થતો હતો તે બાબતનો ખાર રાખીને મહિલાને ગાળો આપવામાં આવી હતી ત્યારબાદ તેના દીકરા સહિત કુલ ચાર વ્યક્તિઓને માર મારીને ગાળો આપી હતી જેથી આ બનાવમાં ઈજા પામેલ લોકોને સારવારમાં લઈ ગયા હતા અને ત્યાર બાદ યુવાને નોંધાવેલ ફરિયાદ આધારે મોરબી એ ડિવિઝન પોલીસ સ્ટેશન ખાતે ગુનો નોંધીને પોલીસે આરોપીઓને પકડવા માટે તજવીજ શરૂ કરેલ છે.

મોરબીના ખાટકીવાસ વિસ્તારમાં રહેતા નવાજ ઈકબાલભાઈ ચૌહાણ (18)એ હાલમાં દાઉદભાઈ કાસમભાઈ ચૌહાણ, શાહરૂખ દાઉદભાઈ ચૌહાણ, ફાતિમાબેન દાઉદભાઈ ચૌહાણ, ઇરમ દાઉદભાઈ ચૌહાણ અને શબ્બીર અબ્બાસભાઈ તરકબાણ રહે. બધા ખાટકીવાસ વાળા સામે ફરિયાદ નોંધાવી છે જેમાં જણાવ્યુ છે કે, ફરિયાદી તેમજ સાહેદ અને આરોપીઓ એક જ ફળિયામાં એક જ મકાનમાં રહે છે જો કે, મકાનની ડેલી બંધ કરવા બાબતે અવારનવાર ઝઘડા થતા હતા અને તે વાતનો ખાર રાખીને દાઉદભાઈ અને શાહરૂખએ ફરિયાદીના ઘરે આવીને તેની માતાને ગાળો આપી હતી જેથી ફરિયાદી અને સાહેદ ઈકબાલભાઈ ત્યાં આવતા આરોપી ફાતિમાબેન અને ઈરમએ સાહેદ ઝરીનાબેન સાથે ઝઘડો કર્યો હતો અને ગાળો આપીને જપાજપી કરી હતી ત્યારે ફરિયાદી વચ્ચે પડતા દાઉદભાઈ તથા શાહરૂખે ફરિયાદી અને સાહેદને ગાળો આપીને ઢીકાપાટુનો માર માર્યો હતો અને શાહરૂખે સાહેદ ઈકબાલને જાનથી મારી નાખવાની ધમકી આપીને માથાના ભાગે લોખંડનો પાઇપ મારીને ઇજા કરી હતી તેમજ ઝરીનાબેનને વાળ પકડીને ઢસડીને શેરીમાં લાવીને ફાતિમાબેન, ઈરમ અને શબ્બીરે મુંઢ માર મારીને ઈજાઓ કરી હતી આ બનાવ સંદર્ભે ઇજા પામેલા લોકોને સારવારમાં ખસેડવામાં આવેલ હતા અને ત્યાર બાદ યુવાને નોંધાવેલ ફરિયાદ આધારે પોલીસે ગુનો નોંધીને આરોપીઓને પકડવા માટે તજવીજ શરૂ કરેલ છે.