મોરબી એ ડિવિઝન-વાંકાનેર તાલુકા પોલીસે 11.12 લાખની કિંમતના 55 મોબાઈલ ફોન શોધીને મૂળ માલિકોને પરત કર્યા

મોરબી જિલ્લાના જુદા જુદા વિસ્તારમાં લોકોના ખોવાઈ ગયેલા કે ચોરાઈ ગયેલા મોબાઈલ ફોન માટે અરજી લઈને પોલીસ વિભાગ દ્વારા ટેકનિકલ વર્કઆઉટ કરીને મોબાઈલ શોધવા માટેની કામગીરી કરવામાં આવતી હોય છે દરમિયાન મોરબી એ ડિવિઝન પોલીસ સ્ટેશન તથા વાંકાનેર તાલુકા પોલીસ સ્ટેશન વિસ્તારમાંથી કુલ મળીને 55 જેટલા મોબાઈલ ફોન શોધી કાઢીને 11.12 લાખથી વધુની કિંમતના મોબાઈલ ફોન તેના મૂળ માલિકોને પરત આપવામાં આવ્યા હતા.

તેરા તુજકો અર્પણ કાર્યક્રમ અંતર્ગત મોરબી સહિત સમગ્ર ગુજરાતની અંદર લોકોના ખોવાઈ ગયેલા કે ચોરાઈ ગયેલા મોબાઈલ ફોન કે પછી અન્ય કિંમતી મુદામાલ શોધી કાઢીને પોલીસ વિભાગ દ્વારા મૂળ માલિકને પરત આપવા માટેની કામગીરી કરવામાં આવતી હોય છે ત્યારે જો મોરબી શહેરની વાત કરીએ તો મોરબી સીટી એ ડિવિઝન પોલીસ સ્ટેશન વિસ્તારમાંથી લોકોના ખોવાઈ ગયેલા કે ચોરાઈ ગયેલા મોબાઈલ ફોન માટે થઈને પોલીસ સ્ટેશન ખાતે જે અરજીઓ આપવામાં આવી હતી તેના આધારે ટેકનિકલ વર્કઆઉટ કરીને પોલીસ દ્વારા એક બે નહિ પરંતુ 41 જેટલા મોબાઈલ ફોન શોધી કાઢવામાં આવ્યા હતા ને 8.37 લાખથી વધુની કિંમતના મોબાઈલ ફોન આજે તેઓના મૂળ માલિકને મોરબી સીટી એ ડિવિઝન પોલીસ સ્ટેશન ખાતે બોલાવીને ડીવાયએસપી પી.એ. ઝાલા તથા એ ડિવિઝન પોલીસ સ્ટેશનના પીઆઇ રાકેશભાઈ પટેલના હસ્તે પરત આપવામાં આવ્યા હતા આવી જ રીતે જો વાંકાનેર તાલુકા પોલીસ સ્ટેશન વિસ્તારમાંથી જે મોબાઈલ ખોવાઈ કે ચોરાઈ ગયેલા હોય તેની અરજીઓ આવી હતી તેના આધારે પોલીસે કુલ મળીને 14 જેટલા મોબાઈલ ફોન શોધી કાઢ્યા હતા અને 2.75 લાખથી વધુની કિંમતના મોબાઈલ ફોન શોધી કાઢીને તેઓના મૂળ માલિકને વાંકાનેરના ડીવાયએસપી સમીર સારડા તથા વાંકાનેર તાલુકાના પીઆઇ દિલીપ ખરાડીના હસ્તે પરત આપવામાં આવ્યા હતા આમ એક જ દિવસની અંદર મોરબી જિલ્લામાં જુદા જુદા બે પોલીસ સ્ટેશન વિસ્તારમાંથી કુલ મળીને 55 જેટલા મોબાઈલ ફોન કે જેની કુલ કિંમત 11.12 લાખથી વધુ થાય છે તે મોબાઈલ ફોન મૂળ માલિકને પોલીસ વિભાગ દ્વારા પરત આપવામાં આવેલ છે.