મોરબીમાં ઘન કચરાના વ્યવસ્થાપન માટે નવા બાયલોઝ બનાવવા મહાપાલિકાની ખાસ સામાન્ય સભામાં અનુમતિ અપાઈ

મોરબી મહાપાલિકામાં આજે ગાંધી જયંતીના દિવસે ખાસ સામાન્ય સભાનું આયોજન કરવામાં આવ્યું હતું અને આ બેઠકમાં શહેરમાંથી નીકળતા ઘન કચરાના વ્યવસ્થાપન માટે નવા બાયલોઝ બનાવવા માટે અનુમતિ આપવામાં આવી હતી. અને માત્ર પાંચ જ મિનિટની અંદર ખાસ સામાન્ય સભાની બેઠક પૂર્ણ કરવામાં આવી હતી

મોરબી મહાપાલિકાના મેયર ઉત્તમ સુરાણીના અધ્યક્ષ સ્થાને મોરબી મહાપાલિકાના સભાખંડમાં ગાંધી જયંતીના દિવસે ખાસ સામાન્ય સભાની બેઠકનું આયોજન કરવામાં આવ્યું હતું જેમાં ડેપ્યુટી મેયર, સ્ટેન્ડિંગ કમિટીના ચેરમેન તેમજ વિવિધ કમિટીના ચેરમેન તથા ચૂંટાયેલા સભ્યો તેમજ કમિશનર સંગીતા રૈયાણી સહિતના અધિકારીઓ અને કર્મચારીઓ હાજર રહ્યા હતા અને આ બેઠકમાં માત્ર બે જ એજન્ડા હતા જેમાં એક એજન્ડા ગત સામાન્ય સભાની બેઠકની કાર્યવાહીને બહાલી આપવામાં આવી હતી અને ત્યારબાદ બીજો એજન્ડા રાજ્ય સરકારના પરિપત્ર મુજબ ઘન કચરાના વ્યવસ્થાપન માટે નવા બાયલોઝ બનાવવા માટેનો હતો જેને તમામ સભ્યો દ્વારા ખાસ સામાન્ય સભામાં અનુમતિ આપવામાં આવી હતી. ઉલેખનીય છે કે, આગામી સ્ટેન્ડિંગ કમિટીની બેઠકમાં નવા બાયલોઝ બનાવીને મૂકવામાં આવશે ત્યાર બાદ તેને સામાન્ય સભામાં રજૂ કરવામાં આવશે. અને મોરબીમાં ઘન કચરાના વ્યવસ્થાપન માટે નવા બાયલોઝ અમલમાં મૂકવા માટેની કાર્યવાહી કરવામાં આવશે.ખાસ કરીને હાલમાં 'સ્વચ્છતા હી સેવા' સંકલ્પ અભિયાન અંતર્ગત મોરબીના તમામ વોર્ડમાં સફાઈ અભિયાન ચાલુ છે. ત્યારે જ્યાં પણ ગંદકી હશે તેનો નિકાલ કરાશે અને નગરજનોને પણ આ અભિયાનમાં જોડાઈને પોતાનું યોગદાન આપવા માટે મેયરે અપીલ કરી હતી તેમજ મોરબીના પરાબજાર સહિતના વિસ્તારોમાં 24 કલાક ધૂળની ડમરીઓ ઉડે છે તેના માટે શું કરશો તે સવાલના જવાબમાં મેયરે જણાવ્યું હતું કે, આગામી દિવસોમાં આ સમસ્યાનો કરવા માટેનું પણ આયોજન કરવામાં આવશે.