મોરબી સબ જેલની કલેક્ટરે લીધી મુલાકાત: કેદીઓની સુવિધાઓ અને જેલ વ્યવસ્થાની કરી સમીક્ષા
SHARE
JOIN OUR GROUP
મોરબી સબ જેલની કલેક્ટરે લીધી મુલાકાત: કેદીઓની સુવિધાઓ અને જેલ વ્યવસ્થાની કરી સમીક્ષા
મોરબી જિલ્લામાં જેલ પ્રશાસનની સુરક્ષા વ્યવસ્થા સુદ્રઢ બને અને જેલ નિયમોનું ચુસ્ત પાલન થાય તે હેતુથી જિલ્લા કલેક્ટર સ્વપ્નિલ ખરે દ્વારા મોરબી સબ જેલની મુલાકાત લઈ વ્યાપક નિરીક્ષણ હાથ ધરવામાં આવ્યું હતું. આ મુલાકાત દરમિયાન કલેક્ટરએ જેલના વિવિધ સત્તાવાર રજિસ્ટર્સ અને કેદીઓના મુલાકાતીઓ અંગે રાખવામાં આવતા રેકોર્ડની ઝીણવટભરી ચકાસણી કરી હતી.
આ તકે કલેક્ટરે જેલની જુદી-જુદી બેરેકમાં રૂબરૂ જઈને કેદીઓ સાથે સીધો સંવાદ સાધ્યો હતો અને તેમના સ્વાસ્થ્ય તેમજ જેલ પ્રશાસન તરફથી મળતી સુવિધાઓ અંગે પૃચ્છા કરી હતી. જેલમાં કેદીઓને આપવામાં આવતા ભોજનની ગુણવત્તાના માપદંડ ચકાસવા માટે કલેક્ટરે પોતે જેલમાં ભોજનનો સ્વાદ ચાખીને રાંધેલા ખોરાકની ગુણવત્તાની પ્રત્યક્ષ ખાતરી કરી હતી. તેમણે માનવીય અભિગમ સાથે કેદીઓ માટેના ટોઇલેટ તેમજ બાથરૂમ વિસ્તારની મુલાકાત લઈ ત્યાંની ભૌતિક સુવિધાઓનું નિરીક્ષણ કર્યું હતું.
મહિલા કેદીઓની બેરેકમાં જઈને તેમણે મહિલાઓની સુરક્ષા, સલામતીના સંવેદનશીલ મુદ્દાઓ અને પરિસરમાં જળવાતી સ્વચ્છતાની પરિસ્થિતિની વિશેષ ચકાસણી કરી હતી. સમગ્ર જેલ કેમ્પસનું ખૂણે-ખૂણેથી બારીકાઈથી નિરીક્ષણ કર્યા બાદ કલેક્ટરએ જેલની આંતરિક સુરક્ષા વ્યવસ્થા અને માનવીય દૃષ્ટિકોણથી જરૂરી એવા જેલ સુધારાત્મક પગલાંઓ અમલમાં મૂકવા માટે જેલર સહિતના હાજર અધિકારીઓને સ્થળ પર જ સૂચનો આપ્યા હતા
