રાજ્યમંત્રી કાંતિભાઈ અમૃતિયાએ મોરબીના પ્રગતિ હેઠળના મોડલ રોડની રૂબરૂ મુલાકાત લઈ સમીક્ષા કરી

મોરબી શહેરના માળખાકીય વિકાસ અને જાહેર સુવિધાઓના કામોને વેગ આપવા માટે ગુજરાત રાજ્યના શ્રમ અને રોજગાર રાજ્યમંત્રી કાંતિભાઈ અમૃતિયા દ્વારા મોરબી મહાનગરપાલિકા ના પ્રગતિ હેઠળના મોડલ રોડ (નાની કેનાલ રોડ) ની આકસ્મિક મુલાકાત લઈ સઘન સમીક્ષા કરવામાં આવી હતી.

મંત્રીએ વિકાસ કાર્યના સ્થળ પર રૂબરૂ જઈને તલસ્પર્શી નિરીક્ષણ કર્યું હતું અને ત્યાં ઉપસ્થિત મહાનગરપાલિકાના ઇજનેરો, ઉચ્ચ અધિકારીઓ તથા સંબંધિત કોન્ટ્રાક્ટર સાથે ટેકનિકલ બાબતો અંગે વિસ્તૃત ચર્ચા-વિચારણા કરી હતી. મંત્રીએ નગરજનોની સુવિધા માટે આ મોડલ રોડનું નિર્માણ કાર્ય સંપૂર્ણ ગુણવત્તાસભર રાખવા તેમજ તેને નિયત સમયમર્યાદામાં અચૂક પૂર્ણ કરવા માટે સૂચના આપી હતી. મંત્રીએ  સ્થાનિક નાગરિકો સાથે અત્યંત સાહજિક સંવાદ સાધીને ઓન-ધ-સ્પોટ તેમની રજૂઆતો અને પ્રશ્નો સાંભળ્યા હતા, તેમજ લોકહિતના આ પ્રશ્નોનું વહીવટી સ્તરેથી તાકીદે નિવારણ લાવવામાં આવશે તેવું જણાવ્યું હતું. આ મુલાકાત દરમિયાન મંત્રીની સાથે મોરબી મહાનગરપાલિકાના મેયર ઉત્તમ સુરાણી, મહાનગરપાલિકાના કમિશનર સંગીતા રૈયાણી, ડેપ્યુટી મેયર ચિરાગભાઈ રાણપરા, નાયબ કમિશનર સંજય સોની તેમજ સ્થાનિક કોર્પોરેટરઓ, મહાનગરપાલિકાની ટેકનિકલ ટીમ, વહીવટી કર્મચારીઓ અને કોન્ટ્રાક્ટર એજન્સીના પ્રતિનિધિઓ ઉપસ્થિત રહ્યા હતા.