મોરબીના રવાપર નજીક આવેલ એપાર્ટમેન્ટની અગાસી ઉપર ફાંસો ખાઈને વૃદ્ધે કર્યો આપઘાત: બોક્ડ થંભા નજીક પાણીમાં ડૂબી જવાથી યુવાનનું મોત

મોરબીના રવાપર ઘુનડા રોડ ઉપર આવેલ એપાર્ટમેન્ટમાં રહેતા વૃદ્ધે એપાર્ટમેન્ટની અગાસી ઉપર જઈને ત્યાં સીડી સાથે કપડું બાંધીને ગળાફાંસો ખાઈને આપઘાત કરી લીધો હતો જ્યારે વાંકાનેર નજીક આવેલ બોકડથંભા પાસે ખાણમાં ભરેલા પાણીની અંદર ડૂબી જવાથી યુવાનનું મોત નીપજ્યું છે.

મોરબીના રવાપર ઘુનડા રોડ ઉપર આવેલ તુલસી પત્ર એપાર્ટમેન્ટ બ્લોક નં. 103 રહેતા હરિભાઈ વેલજીભાઈ દેત્રોજા (70) નામના વૃદ્ધે એપાર્ટમેન્ટના 8 માં માળે જઈને ધાબા ઉપર પાણીના ટાંકાની સીડી સાથે સફેદ કલરનું કપડું બાંધીને તેની સાથે ગળાફાંસો ખાઈને આપઘાત કરી દીધો હતો જેથી કરીને તેઓનું મૃત્યુ નિપજયું હતું અને ત્યાર બાદ તેના મૃતદેહને પીએમ માટે મોરબીની સરકારી હોસ્પિટલ ખાતે લઈને આવ્યા હતા અને આપઘાતના આ બનાવની મોરબી એ ડિવિઝન પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી

વાંકાનેર નજીક આવેલ બોકડ થંભા ગામ ખાતે રહેતા શૈલેષભાઈ જેરામભાઈ સરાવાડીયા (40) નામનો યુવાન કોઈપણ કારણોસર બોકડ થંભાથી એક કિલોમીટર દૂર આવેલ ખાણમાં ભરેલા પાણીમાં ડૂબી ગયો હતો જેથી તેનું મોત નિપજ્યું હતું ત્યારબાદ તેના મૃતદેહને પીએમ માટે વાંકાનેરની સરકારી હોસ્પિટલ ખાતે લઈને આવ્યા હતા અને આ બનાવની વાંકાનેર સિટી પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે.