વાંકાનેરના મેસરીયા પાસે ગોલો ખાઈને પરત જતાં લોકોની કારનું ટાયર ફાટતા સર્જાયેલ અકસ્માતમાં એક સગીરાનો પગ કપાઈ ગયો

વાંકાનેરના કુચીયાદળથી મેસરીયા ગામ ખાતે ગોલો ખાવા માટે કાર લઈને ચાર વ્યક્તિઓ આવ્યા હતા અને ગોલો ખાઈને તેઓ પરત જતા હતા ત્યારે કારનું આગળનું એક ટાયર ફાટ્યું હતું જેથી અકસ્માતનો બનાવ બન્યો હતો અને કાર રોડ સાઈડમાં લગાવેલ ડિવાઇડરના પતરામાં અથડાઈ હતી જે બનાવમાં કારમાં બેઠેલ 16 વર્ષની સગીરાને પગમાં ગંભીર ઇજા થતાં તેનો પગ કપાઈ ગયો હતો અને અન્ય એક વ્યક્તિને બંને પગમાં ઇજાઓ થઈ હતી જેથી ઇજા પામેલા લોકોને સારવાર માટે હોસ્પિટલે લઇ ગયા હતા અને આ બનાવ સંદર્ભે હાલમાં ઈજા પામેલ સગીરાના પિતાએ નોંધાવેલ ફરિયાદ આધારે પોલીસે ગુનો નોંધી આરોપીને પકડવા માટે તજવીજ શરૂ કરેલ છે

રાજકોટના બામણબોર નવાપરા ખાતે રહેતા રમેશભાઈ ઉર્ફે હકાભાઇ કડવાણી (47)એ સ્વિફ્ટ ગાડી નંબર જીજે 3 કેએચ 1696 ના ચાલક રાહુલભાઈ ધરજીયા રહે. ગારીડા વાળાની સામે વાંકાનેર તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે, તેઓની ઇજા પામનાર દીકરી શ્રદ્ધાબેન ઉર્ફે શારદાબેન (16) તથા વિરાજભાઈ, સંજયભાઈ અને રાહુલભાઈ ધરજીયા સ્વિફ્ટ ગાડીમાં કુચિયાદળ ગામથી મેસરીયા ગામ ખાતે ગોલો ખાવા આવ્યા હતા અને ત્યાંથી ગોલો ખાઈને તેઓ પાછા જતાં હતા ત્યારે રાહુલભાઈ ધરજીયા ગાડી ચલાવતો હતો અને વાંકાનેર બાઉન્ડ્રી ભલગામ પાસે ગાડીનું ખાલી સાઇડનું આગળનું ટાયર ફાટતાં રાહુલભાઈએ ગાડીના સ્ટેરીંગ ઉપરથી કાબુ ગુમાવી દીધો હતો અને ગાડી રોડ સાઈડમાં લગાવેલ પતરાના ડિવાઈડર સાથે અથડાઈ હતી જે બનાવમાં ફરિયાદીની દીકરી શ્રદ્ધાબેન ઉર્ફે શારદાબેનને જમણા પગમાં ડિવાઇડરનું પતરું લાગતા પગ કપાઈ જતા ગંભીર ઈજા થઈ છે જ્યારે વિરાજભાઈને બંને પગમાં ઈજાઓ થયેલ છે માટે ઇજાગ્રસ્ત હાલતમાં તેઓને સારવાર માટે હોસ્પિટલે લઈ જવામાં આવેલ છે અને આ બનાવ સંદર્ભે કારના ચાલક સામે ફરિયાદ નોંધાવવામાં આવતા પોલીસે આરોપીને પકડવા માટે તજવીજ શરૂ કરેલ છે