મોરબી નજીક ફૂટબોલની જેમ ઉડાવીને બાળકીનું મોત નિપજાવનાર કાર ચાલક સામે ગુનો નોંધાયો

મોરબીની મહેન્દ્રનગર ચોકડી પાસેથી થોડા દિવસો પહેલા પગપાળા ચાલીને રોડ ક્રોસ કરી રહેલા બાળકીને કાર ચાલકે ફૂટબોલના બોલની જેમ ઉડાવી હતી જેથી તે બાળકી રસ્તા ઉપર પટકાતા તેને ગંભીર ઇજા થઈ હતી અને બાળકીનું સારવાર દરમિયાન મોત નીપજ્યું હતું જે બનાવમાં મૃતક બાળકીના પિતાએ નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરી છે.

રાજકોટ જિલ્લાના પડધરી ગામે ફૂલવાડી શાળા પાસે રહેતા દિલીપભાઈ નરશીભાઇ જાદવએ હલમ કાર નંબર જી.જે. 36 એ.જે. 6647 ના ચાલક સામે ફરિયાદ કરેલ છે જેમાં જણાવ્યુ છે કે ફરિયાદીની 13 વર્ષની દીકરી ઝરણા વેકેશન હોવાથી મોરબી આવી હતી અને તેના માસીની સાથે તે ગત તા. 14 ના રોજ બપોરે 11:00 વાગ્યાના અરસામાં મહેન્દ્રનગર ચોકડી પાસેથી પગપાળા ચાલીને રોડ ક્રોસ કરી રહી હતી ત્યારે કાર ચાલકે ઝરણા જાદવને જોરદાર ટક્કર મારી હતી જેથી તે રસ્તા ઉપર પટકાઈ હતી અને તેને ગંભીર ઇજા થઈ હોવાથી તેને તાત્કાલિક સારવાર માટે મોરબી અને ત્યાંથી રાજકોટ સુધી લઈ જવામાં આવી હતી જો કે, ચાલુ સારવાર દરમિયાન તેનું મોત નીપજ્યું હતુ જે બનાવ સંદર્ભે હાલમાં મૃતક બાળકીના પિતાએ નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરી હતી.