મોરબીના રફાળેશ્વર નજીક દવા પી ગયેલ યુવાનનું સારવારમાં મોત

મોરબી નજીકના રફાળેશ્વર ગામ પાસે પાવર હાઉસ નજીક આજે વહેલી સવારે યુવાન ઝેરી દવા પી ગયો હતો જેથી તેને મોરબી બાદ વધુ સારવાર માટે રાજકોટ લઈ ગયા હતા જો કે, ટૂંકી સારવારમાં તે યુવાનનું મોત નીપજયું હતું જેથી કરીને મોરબી તાલુકા પોલીસ દ્વારા આગળની તપાસ હાથ ધરવામાં આવેલ છે.

મોરબી તાલુકા પોલીસ સુત્રોમાંથી મળતી માહિતી મુજબ મોરબીના વાંકાનેર હાઇવે ઉપર આવેલ રફાળેશ્વર ગામ નજીક પોલીસ હેડ કવાર્ટર પાસે આવેલા પાવર હાઉસ નજીક નિરંજન હિંમતભાઈ સોલંકી નામનો ૨૦ વર્ષનો યુવાન વહેલી સવારના પાંચેક વાગ્યાના અરસામાં ઝેરી દવા પી ગયો હતો જેથી તેને મોરબી સિવિલ હોસ્પિટલ ખાતે સારવાર માટે લઈને આવ્યા હતા અને વધુ સારવાર માટે રાજકોટ ખસેડાયો હતો ત્યાં સારવાર દરમ્યાન સવારે નવેક વાગ્યાના અરસામાં નિરંજન સોલંકીનું મોત નીપજયું હતું આ બનાવને પગલે તાલુકા પોલીસ મથકના અશ્વિનભાઈ ઝાપડિયા દ્વારા રાજકોટ ખાતે જઈને યુવાનના પીએમ સહિતની આગળની તજવીજ શરૂ કરવામાં આવી હતી

યુવાન સારવારમાં

મોરબીના સામાકાંઠે સોઓરડી વિસ્તારની પાછળ આવેલ રામદેવપીર મંદિરની બાજુમાં રહેતા મહેશ પ્રેમજીભાઈ છેલાણીયા નામના ૪૭ વર્ષીય યુવાનને વાહન અકસ્માતના બનાવવામાં ઈજા પહોંચતા તેને આયુષ હોસ્પિટલે સારવાર માટે લાવવામાં આવ્યો હતો અને પોલીસ સૂત્રોના જણાવ્યા પ્રમાણે મોરબીના વાંકાનેર હાઇવે ઉપર આવેલ શક્તિ ચેમ્બરની પાસેથી મહેશ છેલાણીયા પગપાળા જતો હતો દરમિયાનમાં વહેલી સવારે ૬ વાગ્યાના અરસામાં અજાણ્યા બાઈક ચાલકે તેને હડફેટે લેતા ઈજા પામેલ મહેશભાઈને સારવારમાં લઈ ગયા હતા અને બી ડિવિઝન પોલીસ મથકના પ્રફુલભાઈ પરમાર દ્વારા નોંધ કરીને આ અંગે આગળની તપાસ ચલાવવામાં આવી રહી છે.

યુવાન સારવારમાં

મોરબીના સામાકાંઠે માળિયા ફાટક પાસે આવેલા કાંતિનગર વિસ્તારમાં રહેતા મુસ્તાક અસલમભાઈ શેખ નામના ૪૨ વર્ષના યુવાનને માળીયા હાઇવે ઉપર ટિંબડી ગામના પાટીયા પાસે વાહન અકસ્માતના બનાવવામાં ઈજા પહોંચતા તેને સિવિલ હોસ્પિટલે સારવાર માટે લાવવામાં આવ્યો હતો અને આ બનાવને પગલે જાણ થતા હાલમાં તાલુકા પોલીસે મનીષભાઈ બારૈયા દ્વારા આ અંગે આગળની તપાસ ચલાવવામાં આવી રહી છે.