મોરબીમાં સંતાનોની ફી ભરવા માટે વ્યાજે રૂપિયા આપીને યુવાન પાસે પઠાણી ઉઘરાણી કરનારા શખ્સની ધરપકડ

મોરબી શહેરના પંચાસર રોડ ઉપર આવેલ રાજનગર સોસાયટીમાં રહેતા યુવાને તેના સંતાનોની ફી ભરવા માટે ઉપાડ દીધો હતો અને તે ઉપાડની રકમ ચૂકતે કરવા માટે તેને વ્યાજે રૂપિયા લીધા હતા ત્યાર બાદ તે વ્યાજના ચક્રમાં ફસાઈ ગયો હતો અને ધીમે ધીમે કરતાં તેને કુલ મળીને ૧૪.૫૦ લાખ રૂપિયા વ્યાજે લીધા હતા જેની સામે તેણે અત્યાર સુધીમાં ૨૦,૬૯,૫૦૦ ચૂકવી દીધા છે તેમ છતાં પણ વ્યાજખોર દ્વારા ૩૨ લાખ રૂપિયાની પઠાણી ઉઘરાણી કરવામાં આવી રહી છે જેથી ભોગ બનેલા યુવાને નોંધાવેલ ફરિયાદ આધારે પોલીસે આરોપીની ધરપકડ કરેલ છે

મૂળ ધ્રાંગધ્રાના રહેવાસી અને હાલમાં મોરબીના પંચાસર રોડ ઉપર આવેલ રાજનગર સોસાયટીમાં માતૃકૃપા મકાનમાં રહેતા મહાવીરભાઈ નરેન્દ્રભાઈ વૈષ્ણવ જાતે બાબાજી (૩૯) એ જયરાજભાઈ જીવણભાઈ સવસેટા રહે. દેવગઢ તાલુકો માળીયા મીયાણા વાળાની સામે ફરિયાદ નોંધાવેલ હતી કે, તેના સંતાનોની ફી ભરવા માટે થઈને તેણે ટ્રાન્સપોર્ટની ઓફિસમાં નોકરી કરે છે ત્યાંથી ઉપાડ દીધો હતો અને ત્યારબાદ ઉપાડની રકમને ભરવા માટે તેને પૈસાની જરૂર હોય જયરાજભાઇ જીવણભાઈ સવસેટા પાસેથી પહેલી વખત ૫૦૦૦૦ રૂપિયા વ્યાજે લીધા હતા અને ત્યારબાદ વ્યાજના ચક્રમાં તે યુવાન ફસાઈ ગયો હતો અને ધીમે ધીમે કરતાં તેને અલગ અલગ સમયે આરોપી જયરાજભાઇ પાસેથી ૧૪.૫૦ લાખ જેટલી રકમ વ્યાજે લીધી હતી અને તેની સામે તેણે અત્યાર સુધીમાં ઊંચું વ્યાજ ચૂકવીને ૨૦,૬૯,૫૦૦ પરત ચૂકવી દીધા છે તેમ છતાં પણ આરોપી જયરાજભાઈ સવસેટા દ્વારા ફરિયાદી યુવાન પાસેથી મૂડી અને વ્યાજ સહિત કુલ મળીને ૩૨ લાખ રૂપિયાની પઠાણી ઉઘરાણી કરવામાં આવી રહી હતી જેથી કરીને યુવાન દ્વારા નોંધાવવામાં આવેલ ફરિયાદ આધારે મોરબી સીટી એ ડિવિઝન પોલીસ સ્ટેશનની ટીમે આરોપી જયરાજભાઈ જીવણભાઈ સવસેટા રહે. દેવગઢ તાલુકો માળીયા મીયાણા વાળાની ધરપકડ કરેલ છે