મોરબી નજીક ડબલ સવારી બાઇકને હડફેટે લઈને બે યુવાનનું મોત નિપજાવનાર અજાણ્યા વાહન ચાલક સામે ગુનો નોંધાયો

મોરબીની રવિરાજ ચોકડી પાસેથી ડબલ સવારી બાઈક પસાર થઈ રહ્યું હતું ત્યારે અજાણ્યા વાહન ચાલકે બાઈકને હડફેટે લેતા અકસ્માતનો બનાવ બન્યો હતો જે બનાવમાં બાઇક ઉપર જઈ રહેલા બંને યુવાનોને શરીરે ગંભીર ઇજા થઈ હોવાથી તે બંનેના મોત નીપજ્યા હતા અને અકસ્માતના બનાવ સંદર્ભે મૃતક યુવાનના ભાઈની ફરિયાદ લઈને પોલીસે અજાણ્યા વાહન ચાલક સામે ગુનો નોંધી આગળની કાર્યવાહી હાથ ધરી છે.

મોરબી તાલુકાના લક્ષ્મીનગર ગામે રહેતા સાવનભાઈ ભરતભાઈ ડાભી (21)એ અજાણ્યા વાહન ચાલક સામે મોરબી તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે તેઓના નાના ભાઈ કરણભાઈ ભરતભાઈ ડાભી (19) અને વિપુલભાઈ મહેશભાઈ રાવળદેવ (24) બંને બાઈક નંબર જીજે 36 બીસી 7566 લઈને લક્ષ્મીનગર ગામથી મોરબી તરફ જતા હતા ત્યારે બાઈક કરણભાઈ ચલાવતા હતા અને વિપુલભાઈ બાઈકમાં પાછળના ભાગે બેઠેલા હતા ત્યારે કોઈ અજાણ્યા વાહન ચાલકે રવિરાજ ચોકડી પાસે બાઈક હડફેટે લીધું હતું જેથી કરીને અકસ્માતનો બનાવ બન્યો હતો અને આ બનાવમાં બંને યુવાનોને ગંભીર ઇજા થઈ હોવાથી તે બંનેના મોત નીપજ્યા હતા અને આ બનાવ સંદર્ભે હાલમાં મૃતક યુવાનના ભાઈની ફરિયાદ લઈને પોલીસે અજાણ્યા વાહન ચાલક સામે ગુનો નોંધીને આરોપીને પકડવા માટે તજવીજ શરૂ કરેલ છે

અકસ્માતના બનાવમાં ઇજા
મોરબીના લખધીરપુર રોડ ઉપર આવેલ એટોમ સીરામીક ખાતે રહેતા અનુજ સોહનલાલ (26), સંજય રાયસીંગ (40) અને આશિષ ઉમેશકુમાર (26) નામના ત્રણ યુવાનો લખધીરપુર રોડ ઉપર આવેલ રોયલ સિરામિક પાસેથી વાહનમાં જતા હતા ત્યારે સામેથી આવતા ટ્રકને તારવવા જતા તેઓનું વાહન સ્લીપ થઈ ગયું હતું અને અકસ્માત થયો હતો જે બનાવમાં ઇજા પામેલા ત્રણેય યુવાનોને સારવાર માટે 108 મારફતે હોસ્પિટલે લઈને આવ્યા હતા ત્યાં તેને સારવાર આપીને આ બનાવની પોલીસને જાણ કરવામાં આવી હતી