મોરબીમાં બહેન સાથે ઝઘડો કરતાં બનેવીને ઠપકો આપવાનું સાળાને ભારે પડ્યું !

મોરબીની લીલાપર ચોકડી પાસે બહેન સાથે અગાઉ ઝઘડો કરનારા બનેવીને ઠપકો આપતા સાળાને ઢીકા પાટુ અને ધોકા વડે બનેવીએ માર માર્યો હતો જેથી ઈજા પામેલ સાળાને સારવારમાં લઈને આવ્યા હતા અને સારવાર લીધા બાદ તેણે પોતાના બનેવી સામે મોરબી તાલુકા પોલીસ સ્ટેશન ખાતે ફરિયાદ નોંધાવતા પોલીસે આરોપીને પકડવા માટે તજવીજ શરૂ કરેલ છે

બનાવની જાણવા મળતી માહિતી મુજબ મોરબી નજીકના લીલાપર ગામ પાસે એનટી સ્ટુડિયોની સામેના ભાગમાં રહેતા વિનોદભાઈ શાંતિલાલ કડેવાર જાતે દેવીપુજક (૪૦)એ હાલમાં પોતાના બનેવી કેશુભાઈ મનજીભાઈ ફુલતરીયા રહે. વાલાસર તાલુકો વાંકાનેર વાળાની સામે ફરિયાદ નોંધાવી છે જેમાં તેને જણાવ્યું છે કે, આરોપી તેના બનેવી થાય છે અને અગાઉ તેની બહેન સાથે તેણે ઝઘડો કર્યો હતો જે બાબતે ફરિયાદી યુવાને તેના બનેવીને ઠપકો આપતા બનેવી ઉશ્કેરાઈ ગયા હતા અને તેને ફરિયાદી યુવાનને ગાળો આપીને ઢીકાપાટુનો માર માર્યો હતો ત્યારબાદ ધોકા વડે માર મારતા પગમાં ફ્રેકચર જેવી ઇજા થઈ હતી જેથી ઇજાગ્રસ્ત હાલતમાં તે યુવાનને સારવાર માટે મોરબીની હોસ્પિટલમાં લઈને આવ્યા હતા અને ત્યાં સારવાર લીધા બાદ ભોગ બનેલા યુવાન દ્વારા હાલમાં મોરબી તાલુકા પોલીસ સ્ટેશન ખાતે તેના બનેવી સામે ફરિયાદ નોંધવામાં આવતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે