મોરબીના લીલાપર નજીક પેપર મિલના મશીનમાં પડી જવાથી યુવાનનું મોત

મોરબીના લીલાપર રોડ ઉપર આવેલ પેપર મિલમાં કામગીરી દરમિયાન મશીનમાં પડી જતા યુવાનને ગંભીર ઇજા થઈ હતી જેથી તેનું મોત નીપજયું હતું અને ત્યારબાદ તેના મૃતદેહને મોરબીની સરકારી હોસ્પિટલે લઈને આવ્યા હતા અને આ બનાવની તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે.

મૂળ ઉત્તર પ્રદેશમાં રહેવાસી અને હાલમાં મોરબીના લીલાપર રોડ ઉપર આવેલ રાધેશ્યામ પેપર મીલના લેબર કવાર્ટરમાં રહેતો અને મજૂરી કામ કરતો વિવેક જમાહિરલાલ ચમાર (19) નામનો યુવાન ગઈકાલે સવારે 10:15 વાગ્યાના અરસામાં કારખાનામાં મજૂરી કામ કરી રહ્યો હતો ત્યારે મશીનમાં પડી જવાના કારણે તે યુવાનને ગંભીર ઇજા થઈ હતી જેથી તે યુવાનનું મોત નીપજયું હતું અને ત્યારબાદ તેના મૃતદેહને મોરબીની સરકારી હોસ્પિટલ ખાતે લઈને આવ્યા હતા અને ત્યાંથી આ બનાવની મોરબી તાલુકા પોલીસ સ્ટેશન ખાતે જાણ કરતા પોલીસે અકસ્માત મૃત્યુના બનાવની નોંધ કરી આગળની કાર્યવાહી હાથ ધરી હતી.

ફિનાઇલ પી લેતા સારવારમાં

મોરબીના સનાળા ગામે રહેતો સંદીપ મહેશભાઈ ડાંગર (28) નામનો યુવાન કોઇ કારણોસર બાયપાસ રોડ ઉપર આવેલ દલવાડી સર્કલ પાસે ફીનાઇલ પી જતા તેને તાત્કાલિક સારવાર માટે મોરબીની સિવિલ હોસ્પિટલ ખાતે લઈને આવ્યા હતા અને ત્યાં તેને સારવાર આપ્યા બાદ આ બનાવની પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.

વૃદ્ધા સારવારમાં

માળીયાના વર્ષામેડી ગામે રહેતા રહેમતબેન હકીમભાઇ જત (61) નામના વૃદ્ધા બાઈકમાં બેસીને જતા હતા ત્યારે વવાણીયા નજીક કાસમપીરની દરગાહ પાસે બાઈક સ્લીપ થવાના કારણે અકસ્માત થયો હતો જે બનાવમાં ઈજા પામેલ વૃદ્ધને સારવાર માટે હોસ્પિટલ લઈ ગયા હતા અને ત્યારબાદ આ બનાવની પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી.