મોરબીના પાનેલી રોડે કારખાનના કવાર્ટર પાસે પાણી ભરેલ ડોલમાં ડૂબી જવાથી એક વર્ષની બાળકીનું મોત

મોરબીના રફાળેશ્વર ગામ નજીક પાનેલી રોડ ઉપર આવેલ કારખાનાની સામે ધરતી પ્લાસ્ટની લેબર કોલોનીમાં રહેતા અને મજૂરી કામ કરતા યુવાનની એક વર્ષની દીકરી કોઈ કારણોસર પાણી ભરેલી ડોલમાં પડી ગયેલ હતી અને પાણી ભરેલ ડોલમાં ડૂબી જવાના કારણે તેનું મોત નીપજ્યું હતું ત્યારબાદ તેના મૃતદેહને મોરબીની સરકારી હોસ્પિટલ ખાતે લઈને આવ્યા હતા અને આ બનાવની હોસ્પિટલ મારફતે તાલુકા પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી.

મધ્યપ્રદેશના રહેવાસી અને હાલમાં મોરબી નજીકના રફાળેશ્વર ગામે પાનેલી રોડ ઉપર આવેલ સિમોરા કારખાના સામે ધરતી પ્લાસ્ટના લેબર ક્વાર્ટરની કોલોનીમાં રહેતા અરવિંદભાઈ દલુભાઈ મંડલોઈની એક વર્ષની દીકરી આરાધ્યા કોઈ કારણોસર પાણી ભરેલી ડોલમાં ડૂબી ગયેલ હતી જેથી કરીને તેનું ઘટના સ્થળે જ મોત નીપજયું હતું ત્યાર બાદ તેના મૃતદેહને તાત્કાલિક મોરબીની સરકારી હોસ્પિટલ ખાતે લઈને આવ્યા હતા અને ત્યાં ફરજ ઉપરના ડોક્ટરે તેને જોઈ તપાસીને મૃત જાહેર કરી હતી અને આ બનાવની હોસ્પિટલ મારફતે મોરબી તાલુકા પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.

મહિલા સારવારમાં

મોરબીના પાનેલી ગામે રહેતા મોંઘીબેન મોહનભાઈ હડિયલ (62) નામના વૃદ્ધા બાઈકમાં બેસીને ગામ નજીકથી પસાર થતા હતા ત્યારે બાઇક સ્લીપ થવાના કારણે તેઓને અકસ્માતના બનાવમાં ઈજા થઈ હતી જેથી તેને સારવાર માટે મોરબીની આયુષ હોસ્પિટલ ખાતે લાવ્યા હતા અને ત્યાં તેને સારવાર આપીને બનાવની તાલુકા પોલીસને જાણ કરવામાં આવી હતી

શોર્ટ લાગતાં સારવારમાં

મોરબીના પીપળી રોડ ઉપર આવેલ નોવાલેક ડેકોર નામના કારખાનામાં કામગીરી દરમિયાન રાજુભાઈ બરાન્દ્રાસિંગ (25) નામના યુવાનને ઇલેક્ટ્રીક શોટ લાગ્યો હતો જેથી તેને તાત્કાલિક સારવાર માટે મોરબીની ખાનગી હોસ્પિટલમાં લઈને આવ્યા હતા અને ત્યાં તેને સારવાર આપ્યા બાદ આ બનાવની પોલીસને જાણ કરતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે.