મોરબીમાં પરણીતા સાથે રિલેશનમાં રહેલા યુવાનને મહિલાના પતિએ માર માર્યો

મોરબીમાં રહેતો યુવાન પરણીતા સાથે રિલેશનમાં હતો અને તેની સાથે ઊભો હતો ત્યારે પરણીતાના પતિએ તેને જોઈ જતાં તેને સારું ન લાગતા તેને યુવાનની સાથે ઝપાઝપી કરીને ઢીકાપાટુનો માર માર્યો હતો. જેથી ભોગ બનેલા યુવાન દ્વારા પરણીતાના પતિની સામે મોરબી એ ડિવિઝનમાં ફરિયાદ નોધાવવામાં આવતા પોલીસે આગળની કાર્યવાહી હાથ ધરી છે.

વર્તમાન સમયમાં ઘણી વખત સમાજ માટે લાલબત્તી સમાન કિસ્સાઓ સામે આવતા હોય છે તેવી જ રીતે મોરબી શહેરમાં રહેતો યુવાન પરણીતા સાથે રિલેશનમાં હોય પરણીતાના પતિને તે ગમતું ન હતું અને તે બંનેને સાથે જોઈ જતાં યુવાનને મોરબીમાં આવેલ મંગલભુવન ચોક પાસે પરિણીતાના પતિએ ઝપાઝપી કરીને ઢિકાપાટુનો માર માર્યો હતો જેથી ભોગ બનેલા યુવાને સારવાર લીધા બાદ મોરબી એ ડિવિઝન પોલીસ સ્ટેશન ખાતે પરણીતાના પતિ સામે ફરિયાદ નોંધાવતા પોલીસે ગુનો નોંધીને આગળની કાર્યવાહી હાથ ધરી છે

મહિલા સારવારમાં

ટંકારા તાલુકાના હડમતીયા ગામે રહેતા લીલાબેન હસમુખભાઈ વાઘેલા (50) નામના મહિલાને મારામારીના બનાવમાં ઈજા થતા પ્રાથમિક સારવાર ટંકારામાં આપ્યા બાદ વધુ સારવાર માટે મોરબીની સિવિલ હોસ્પિટલ ખાતે લાવ્યા હતા અને આ બનાવની હોસ્પિટલ મારફતે પોલીસને જાણ કરવામાં આવતા પોલીસે આગળની કાર્યવાહી હાથ ધરી હતી

ઝેરી દવા પી ગયેલ યુવાન સારવારમાં

હળવદ તાલુકાના ટીકર ગામે સોયલા ધનજી તોમર (22) નામના યુવાને કોઇ કારણોસર ઝેરી દવા પી લીધી હતી જેથી કરીને તેને પ્રાથમિક સારવાર માટે હળવદની સરકારી હોસ્પિટલમાં લઈ ગયા હતા અને ત્યારબાદ બેભાન હાલતમાં તેને વધુ સારવાર માટે મોરબીની સરકારી હોસ્પિટલ ખાતે લાવ્યા હતા અને આ બનાવની હોસ્પિટલ મારફતે પોલીસને જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે.