મોરબી નજીક સ્કોર્પિયો ગાડીના બોનેટ ઉપર કેક મૂકીને તલવાર વડે કટીંગ કરનારા જીઆરડી જવાન સહિત બે ની ધરપકડ

મોરબી તાલુકામાં સોશિયલ મીડિયામાં એક વિડીયો વાયરલ થયો હતો જેમાં કારના બોનેટ ઉપર કેક રાખીને તેનું તલવાર વડે કટીંગ કરવામાં આવતું હોય અને અતિશબાજી થતી હોય તેવું જોવા મળતું હતું જે સંદર્ભે તાલુકા પોલીસ સ્ટેશન ખાતે જીઆરડીના જવાનની સામે કલેકટરના જાહેરનામાના ભંગનો ગુનો નોંધાયો હતો અને પોલીસે આ ગુનામાં જીઆરડીના જવાન સહિત કુલ બે આરોપીની ધરપકડ કરેલ છે.

મોરબીમાં સોશિયલ મીડિયામાં એક વિડીયો વાયરલ થયો હતો જેમાં સ્કોર્પિયો ગાડીના બોનેટ ઉપર એક સાથે સાતથી આઠ જેટલી કેક મૂકવામાં આવી હતી અને તલવાર વડે તે કેકનું કટીંગ કરવામાં આવતું હોય, અતિશબાજી ચાલુ હોય તે પ્રકારના દ્રશ્યો આ વીડિયોની અંદર જોવા મળી રહ્યા હતા અને વિડીયો વાયરલ થયા બાદ પોલીસ દ્વારા તપાસ હાથ ધરવામાં આવી હતી અને વિડિયોમાં જીઆરડી જવાન હરેશ સોલંકી હોવાનુ સામે આવ્યું હતું.

જેથી કરીને મોરબી તાલુકા પોલીસ સ્ટેશન ખાતે જીઆરડીના જવાન હરેશભાઈ પોપટભાઈ સોલંકી રહે. ઊંચી માંડલ તાલુકો મોરબી વાળાની સામે ગુનો નોંધીને પોલીસે આગળની કાર્યવાહી કરી હતી અને આ ગુનામાં પોલીસે હાલમાં આરોપી હરેશભાઈ પોપટભાઈ સોલંકી (31) અને નિકુંજ જીલુંભાઈ સોલંકી (20) રહે. બંને ઊંચી માંડલ તાલુકો મોરબી વાળાની પીએસઆઈ એ.બી. મિશ્રા અને તેની ટીમ દ્વારા ધરપકડ કરવામાં આવેલ છે.

અત્રે ઉલેખનીય છે કે, ગત તા. 20/9/ 2024 ના રાતના 9:00 વાગ્યાના અરસામાં મોરબી હળવદ હાઇવે રોડ ઉપર આવેલ નીચી માંડલ ગામ નજીક શ્રીહરિ કોમ્પલેક્ષ પાસે જાહેર જગ્યામાં કાળા કલરની સ્કોર્પિયો ગાડીના બોનેટ ઉપર હરેશ નામ લખેલી સાતથી આઠ જેટલી કેક રાખવામાં આવી હતી અને તે કેકને તલવાર વડે કટીંગ કરવામાં આવ્યું હતું જે વિડીયો સોશિયલ મીડિયામાં ઇન્સટગ્રામ ઉપર પોસ્ટ કરવામાં આવ્યો હતો તેના આધારે પોલીસે કાર્યવાહી કરી છે.