માળિયા(મી) નજીક દેવસોલ્ટ ફેકટરીમાં ક્લોરીન લીકેજની મોકડ્રીલ યોજાઇ

મોરબી જિલ્લાના માળિયા (મિં) તાલુકાના દેવ સોલ્ટ મીઠાની ફેકટરીમાં અગમ્ય કારણોસર ક્લોરીન વાયુ લીકેજ થતા શ્રમિકને ગભરામણ થતા ફેકટરીમાં સાયરન વગાડતા તુરંત જ ફેકટરીના હેલ્થ સેફટી ડીપાર્ટમેન્ટ દ્રારા પોતાની એમ્બ્યુલસ દ્રારા સારવાર માટે લઇ જવામાં આવ્યા હતા. કલોરીન વાયુ ફેલાતો અટકે તે માટે તુરંત જ પ્રયત્નો શરૂ કરવામાં આવ્યાં હતા. અન્ય  મજુરોને બનાવની જગ્યાથી તાત્કાલીક દુર કરવામાં આવ્યા હતા. આમ છતા ક્લોરીન વાયુ લીકેજ બંધ ન થતા સેફ્ટી ડીપાર્ટમેન્ટ દ્વારા કલેકટરશ્રી તેમજ સ્ટેટ કન્ટ્રોલ રૂમને જાણ કરાતા એન. ડી. આર. એફ.ની ટીમ ઘટના સ્થળે પહોચી હતી.

એન.ડી.આર.એફ.ની ટીમ પહોચ્યા બાદ તુરંત જ  ટીમની જુદી જુદી ટીમો દ્રારા તાત્કાલીક ક્લોરીન વાયુ ક્યાંથી લીકેજ થયો છે તેની તપાસમાં લાગી ગઇ હતી. આથી ક્લોરીન વાયુ ક્યાં લીકેજ  છે તે શોધ્યા બાદ ટીમના અન્ય સભ્યો દ્રારા લીકેજ બંધ કરવામાં લાગી ગયા હતા. તેમજ અન્ય શ્રમિકો  કે જેઓ  ક્લોરીન અસરથી બેભાન થયા હતા તેઓને પ્રાથમીક સારવાર બાદ ૧૦૮ની ટીમે હોસ્પીટલે ખસેડ્યા હતા. એન.ડી.આર.એફ.ની ટીમ દ્વારા ક્લોરીન વાયુ લીકેજ બંધ કર્યા બાદ ગુજરાત ગેસ કંપનીની ટીમ દ્વારા ગેસ લાઇન લીકેજ થયેલ છે કે કેમ તેની પણ તપાસ કરવામાં  આવી હતી. આમ કાર્યક્રમના  અંતે મેનેજમેન્ટ દ્રારા આ એક મોકડ્રીલ હોવાનું જણાવ્યું હતું. આ કાર્યક્રમને અંતે એન.ડી.આર.એફ.ની ટીમના ડેપ્યુટી કમાન્ડર વિજય કુમાર દ્રારા એન.ડી.આર.એફ. કેવી પરિસ્થિતીમાં કેવી રીતે કામ કરે છે તેની દેવ સોલ્ટના શ્રમિકો તેમજ મેનેજમેન્ટ સ્ટાફને માહીતગાર કર્યા હતા. આ કાર્મક્રમમાં માળિયા(મિં)ના પ્રાંત અધિકારી હર્ષદીપ આચાર્ય, એન.ડી.આર.એફ.ના ડેપ્યુટી કમાન્ડર રણ વિજયકુમાર અને તેમની ટીમ સાથે ગુજરાત ગેસ કંપનીની ટીમ, માળિયા(મિં)ના મામલદાર ડી.સી.પરમાર, માળિયા(મિં)ના પોલીસ સબ ઇન્સ્પેકટર નરેન્દ્રસીંહ ચુડાસમા, ૧૦૮ની ટીમ તેમજ દેવ સોલ્ટના ડાયરેકટર વિવેક સોમાણી તેમજ દેવ સોલ્ટના શ્રમિકો તેમજ કંપની સ્ટાફ આ મોકડ્રીલમાં ઉપસ્થિત રહ્યા હતા.