હળવદના રાણેકપર ગામ પાસે ટ્રેક્ટરની ટ્રૉલી સાથે બાઇક અથડાતાં યુવાનનું મોત

હળવદ તાલુકાના રાણેકપર ગામ તરફ જવાના રસ્તા ઉપરથી યુવાન ટ્રેક્ટરની ટ્રૉલીમાં મરચી ભરીને હળવદ ખાતે થઈને આપવા માટે જઈ રહ્યો હતો ત્યારે બાઈક લઈને પસાર થઈ રહેલ યુવાને ટ્રેક્ટર સાથે બાઇકને અથડાવ્યું હતું જેથી અકસ્માતનો બનાવ બન્યો હતો જે બનાવમાં બાઈક ઉપર જઈ રહેલા યુવાનને ગંભીર ઇજા થતાં તેનું મોત નીપજયું હતું જે બનાવ સંદર્ભે ટ્રેક્ટર ચાલકની ફરિયાદ લઈને પોલીસે મૃતક યુવાન સામે ગુનો નોંધીને આગળની રાબેતા મુજબની કાર્યવાહી હાથ ધરી છે

મૂળ મહીસાગર જિલ્લાના રહેવાસી અને હાલમાં હળવદ તાલુકાના રાણેકપર ગામની સીમમાં ચંદ્રકાંતભાઈ પટેલની વાડીએ રહેતા અને ખેતીકામ કરતા અશ્વિનભાઈ દલાભાઈ તાવીયાડ (40)એ હળવદ તાલુકા પોલીસ સ્ટેશન ખાતે મૃતક ભરતભાઈ શામજીભાઈ સીપરા (45) રહે. નવા રાણેકપર વાળાની સામે ફરિયાદ નોંધાવેલ છે જેમાં તેને જણાવ્યુ છે કે, નવા રાણેકપર અને જુના રાણેકપર ગામની વચ્ચે આવેલ વાડી પાસેથી તે પોતાનું ટ્રેક્ટર નંબર જીજે 36 એઆર 8522 લઈને ચંદ્રકાંતભાઈ પટેલની વાડીએથી ટ્રેક્ટરમાં મરચા ભરીને હળવદ ખાતે આપવા માટે જઈ રહ્યા હતા ત્યારે ભરતભાઈએ તેનું બાઈક નંબર જીજે 36 એજી 9045 બેદરકારીથી ચલાવીને ટ્રેક્ટરની ટ્રોલી સાથે અથડાવ્યું હતું અને અકસ્માત કર્યો હતો. આ બનાવમાં ભરતભાઈ સીપરાને ગંભીર ઇજા થઈ હતી જેથી તેનું મોત નીપજયું હતું અને આ બનાવ સંદર્ભે હાલમાં મૃતક યુવાન સામે ગુનો નોંધીને પોલીસે રાબેતા મુજબની કાર્યવાહી હાથ ધરી છે