મોરબી જીલ્લામાં 10 સામે 34.82 લાખથી વધુના સાયબર ફ્રોડની બે ફરિયાદ: આરોપીઓને પકડવા તજવીજ

સમગ્ર ભારતદેશની અંદર સાઇબર ક્રાઈમના ગુના દિવસેને દિવસે વધી રહ્યા છે અને લોકોની સાથે યેનકેન પ્રકારે છેતરપિંડી, ઠગાઈ કે વિશ્વાસઘાત કરીને સાયબર ફ્રોડ કરવામાં આવતા હોય છે તેવામાં મોરબી જિલ્લા સાયબર ક્રાઇમ પોલીસ સ્ટેશન તથા બી ડિવિઝન પોલીસ સ્ટેશન ખાતે સાયબર ક્રાઇમના વધુ બે ગુના નોંધાયેલા છે જેમાં કુલ મળીને 34.82 લાખથી વધુની રકમ જુદા જુદા બેન્ક એકાઉન્ટમાં આવી હતી અને તેને ચેક અથવા તો એટીએમથી વિટ્રો કરીને સગેવગે કરવામાં આવી હતી જેથી કરીને હાલમાં કાયદાના સંકર્ષમાં આવેલ કિશોર સહિત ફૂલ મળીને 10 વ્યક્તિઓની સામે જુદાજુદા બે ગુના નોંધીને પોલીસે આરોપીઓને પકડવા માટે તજવીજ શરૂ કરેલ છે.

મોરબી જિલ્લા સાયબર ક્રાઇમ પોલીસ સ્ટેશન ખાતે વધુ એક સાયબર ફ્રોડનો ગુનો નોંધાયો છે જેમાં બેંકના જુદા જુદા એકાઉન્ટની અંદર સાયબર ફ્રોડથી 20,81,347 રૂપિયા આવ્યા હતા અને તેને ચેક અથવા તો એટીએમથી વિટ્રો કરીને સગેવગે કરવામાં કરવામાં આવ્યા હતા અને તેના માટે બેન્ક એકાઉન્ટ ધારકોને ત્રણ-ત્રણ ટકા કમિશન મળતું હોવાનું સામે આવ્યું છે જેથી હાલમાં સાયબર ક્રાઇમ પોલીસ સ્ટેશનના કર્મચારી મનોજભાઈ ઠાકરશીભાઈ લકુમ દ્વારા કાયદાના સંઘર્ષમાં આવેલ કિશોર તેમજ ચેતનસિંહ રવિન્દ્રસિંહ ચૌહાણ રહે. ગુજરાત હાઉસિંગ બોર્ડ સનાળા રોડ મોરબી, મુસ્તાક હારૂણભાઇ રાઉમા રહે. બી-7 બ્લોક નંબર 102 પ્રધાનમંત્રી આવાસ યોજના દલવાડી સર્કલ પાસે મોરબી, સંજયભાઈ રાજપુત રહે. જૂન જૂન રાજસ્થાન, નિકુંજ પ્રવીણભાઈ દલસાણીયા રહે. ઉમિયાનગર ચિતલ રોડ બાબરા, જયદેવ ભરતભાઈ કરથીયા રહે. ગ્રીન ચોક કંસારા શેરી જુમા મસ્જિદની બાજુમાં મોરબી અને રક્ષિત કલ્પેશભાઈ કુંવરિયા રહે. ક્રિષ્ના સ્કૂલ પાસે રવાપર રેસીડેન્સી ભીમનાથ-એ બ્લોક નંબર 401 મોરબી વાળાની સામે ફરિયાદ નોંધાવતા પોલીસે ગુનો નોંધીને આરોપીઓને પકડવા માટે તજવીજ શરૂ કરેલ છે.

જ્યારે સાયબર ક્રાઇમનો બીજો ગુનો મોરબી સીટી બી ડિવિઝન પોલીસ સ્ટેશન ખાતે નોંધાયો છે જેમાં પી.એસ.આઇ. વાય.પી. વ્યાસે આરોપી પ્રતીક જીતેશભાઈ કુબાવત રહે. શ્રી રામ હરી પાર્ક અરૂણોદયનગર મોરબી, મહાવીરસિંહ પપ્પુભા વાઘેલા રહે. પીપળી મોરબી અને રવિભાઈ ગઢવી રહે. મોરબી તથા તપાસમાં ખુલે તેની સામે ફરિયાદ નોંધાવેલ છે જેમાં જણાવ્યુ છે કે, ત્રણેય આરોપીઓએ લાગતા વળગતાઓ સાથે મિલાપીપણું કરીને પૂર્વ આયોજિત ગુનાહિત કાવતરું કરીને અલગ અલગ વ્યક્તિઓ પાસેથી સાયબર ફ્રોડથી કે છેતરપિંડીથી મેળવેલ રકમ સગેવગે કરી હતી અને પ્રતિક કુબાવત અને મહાવીરસિંહ વાઘેલાને એજન્ટ તરીકે નીમી તેઓએ આર્થિક લાભ આપવા લાલચ આપી બે ટકા કમિશન પેટે આપતા હતા અને તેઓના બેન્ક એકાઉન્ટમાં સાયબર ફ્રોડથી 14,01,992 ની રકમ આવી હતી જેને ચેકથી અથવા તો એટીએમથી વીડ્રો કરી સાયબર ફ્રોડથી મેળવેલાં નાણાં સગેવગે કરીને ગુનો કર્યો હતો જેથી પોલીસે હાલમાં આરોપીઓને પકડવા માટે તજવીજ શરૂ કરેલ છે.