મોરબીમાં લાંચ લેવાના ગુનામાં પકડાયેલ પીજીવીસીએલના નાયબ ઇજનેર-વચેટિયાના બે દિવસના રિમાન્ડ મંજૂર

મોરબીમાં સોલાર પેનલ લગાવવાનું કામ કરતી કંપની પાસેથી સમયસર ઇલેક્ટ્રીક મીટર લગાવવા સહિતની બાબતે પીજીવીસીએલના નાયબ ઇજનેર દ્વારા 20 હજારની લાંચની માંગણી કરવામાં આવી હતી જે રકમ તેના વચેટિયાએ સ્વીકારી હતી ત્યારે એસીબીની ટીમે તેને રંગે હાથે પકડીને અધિકારીને પણ ઝડપી લીધા હતા જે બંને આરોપીઓને રિમાન્ડની માંગણી સાથે કોર્ટમાં રજૂ કરવામાં આવતા કોર્ટ બંને આરોપીના બે દિવસના રિમાન્ડ મંજૂર કર્યા છે. 

મોરબીમાં સોલાર પેનલ લગાવવાનું કામ કરતી કંપનીએ બે જગ્યાએ સોલાર પ્લાન્ટનું કામ કર્યું હતું અને ત્યાં બંને સ્થળે સોલાર પ્લાન્ટમાં સમયસર ઇલેક્ટ્રિક મીટર લગાવવા માટે તથા લગાવેલ સોલાર પ્લાન્ટમાં કોઇપણ પ્રકારની હેરાનગતિ ન કરવા માટે પીજીવીસીએલના નાયબ ઇજનેર દ્વારા 20 હજાર રૂપિયાની લાંચ માંગવામાં આવી હતી. જો કે, સોલરનું કામ કરતી કંપનીએ લાંચ આપવી ન હોય એસીબીનો સંપર્ક કર્યો હતો. ત્યાર બાદ એસીબીએ છટકું ગોઠવીને નાયબ ઇજનેર વતી લાંચની રકમ લેતા વચેટિયો પ્રવીણભાઇ નાનજીભાઇ માકાસણાને ઝડપી લીધો હતો. અને ત્યાર બાદ પીજીવીસીએલના નાયબ ઈજનેર મનીષભાઇ અરજણભાઇ જાદવને પણ એસીબીને ટીમે પકડીને બંને સામે ગુનો નોંધીને આગળની કાર્યવાહી કરી હતી અને આ બંને આરોપીઓને રિમાન્ડની માંગણી સાથે કોર્ટમાં રજૂ કરવામાં આવતા કોર્ટે બંને આરોપીઓના બે દિવસના એટ્લે કે સોમવારે સાંજ સુધીના રિમાન્ડ મંજૂર કર્યા છે.