હળવદમાં બાઈક પાર્ક કરવા બાબતે બોલાચાલી કરીને વૃદ્ધ ઉપર પાઇપ વડે હુમલો

હળવદમાં દરબાર નાકા પાસે વૃદ્ધના ઘર પાસે બાઈક પાર્ક કરવા બાબતે બોલાચાલી કરીને તેનો ખાર રાખીને વૃદ્ધ ઉપર લોખંડના પાઇપથી હુમલો કર્યો હતો અને તેને જમણા ગાલ ઉપર અને જમણા હાથમાં માર માર્યો હતો અને ઇજા કરી હતી. આટલું જ નહીં ગાળો આપીને જાનથી મારી નાખવાની ધમકી આપવામાં આવી છે જેથી ભોગ બનેલા વૃદ્ધે સારવાર લીધા બાદ હળવદ તાલુકા પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધી આરોપીને પકડવા માટે તજવીજ શરૂ કરેલ છે.

હળવદના નાડોદાવાસ પાણીની બારી નવી જીઇબી ઓફિસ પાસે રહેતા વિષ્ણુભાઈ ખીમશંકરભાઈ જોશી (58)એ કરણ નવીનભાઈ ચાવડા રહે. દરબાર નાકા પાસે હળવદ વાળા સામે ફરિયાદ નોંધાવી છે જેમાં જણાવ્યું છે કે, ફરિયાદીના ઘર પાસે બાઈક રાખવા બાબતે આરોપીએ બોલાચાલી કરી હતી અને ત્યારબાદ આરોપીએ લોખંડના પાઇપથી ફરિયાદીને જમણા ગાલ ઉપર તથા જમણા હાથ ઉપર મારમારીને ઇજા કરી હતી ત્યારે તેઓને હાથમાં ફ્રેક્ચર જેવી ઇજા થઈ હતી અને આરોપીએ ગાળો આપીને જાનથી મારી નાખવાની ધમકી આપેલ છે જેથી ભોગ બનેલા વૃદ્ધે સારવાર લીધા બાદ હળવદ તાલુકા પોલીસ સ્ટેશને ફરિયાદ નોંધાવતાં પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.

બાળક સારવારમાં

મોરબીમાં અવની પાર્ક પાવઠાની વાડી ખાતે રહેતો તુષાર અમરશીભાઈ ડાભી (8) નામનો બાળક તેના પિતા સાથે બાઈકમાં બેસીને જઈ રહ્યો હતો દરમિયાન તે બાઈકમાંથી પડી જતા તેને જમણા હાથમાં ઈજા થઇ હોવાથી ઇજા પામેલ બાળકને સારવાર માટે મોરબીની ખાનગી હોસ્પિટલમાં લઈને આવ્યા હતા ત્યારે તેને સારવાર આપીને આ બનાવની પોલીસને જાણ કરતા પોલીસ આગળની કાર્યવાહી હાથ ધરી છે.

ફિનાઇલ પી જતાં સારવારમાં

મોરબીના વાવડી રોડ ઉપર આવેલ કબીર આશ્રમ પાસે શિવરામ પાર્કમાં રહેતા દિવ્યાબેન પ્રવીણભાઈ ખાણઘર (30) નામની મહિલા પોતે પોતાના ઘરે હતી ત્યારે ફિનાઇલ પી જતા તેને સારવાર માટે મોરબીની મંગલમ હોસ્પિટલ ખાતે લઈને આવ્યા હતા ત્યાં તેને સારવાર આપ્યા બાદ આ બનાવની પોલીસને જાણ કરતાં પોલીસ આગળની કાર્યવાહી હાથ ધરી છે.