હળવદ તાલુકામાં મજૂરોની માહિતી પોલીસને ન આપનાર ત્રણ વ્યક્તિ સામે ગુના નોંધાયા

મોરબીમાં બહારના ઘણા મજૂરો ઉદ્યોગ અને ખેતીમાં રોજગારી માટે આવે છે તેની માહિતી પોલીસને આપવા માટે જાહેરનામા પ્રસિદ્ધ કરવામાં આવે છે જો કે, પોલીસને માહિતી આપવામાં આવતી નથી તેવામાં હળવદ તાલુકામાં જુદીજુદી ત્રણ જગ્યાએ ચેક કર્યું હતું ત્યારે મજૂરોની માહિતી પોલીસને આપવામાં આવી ન હોવાનું સામે આવ્યું હતું જેથી જાહેરનામા ભંગના જુદાજુદા ત્રણ ગુના નોંધીને પોલીસે આગળની કાર્યવાહી કરેલ છે.

હળવદ પોલીસની ટીમ ઇંગોરાળા રોડ ઉપર પેટ્રોલિંગમાં હતી ત્યારે ત્યાં ખેતી કામ માટે રાખવામાં આવેલા મજૂરોના આઈડી પ્રૂફ લેવામાં આવ્યા ન હતા અને મોરબી એસયોર્ડ એપ્લિકેશનમાં તેની નોંધ કરવામાં આવી ન હતી જેથી કરીને હાલમાં મનસુખભાઈ બાવલભાઈ માકાસણા (65) રહે. વિશ્વાસ સોસાયટી સરા રોડ કેનાલ પાસે હળવદ વાળા સામે જાહેરનામા ભંગનો ગુનો નોંધાયેલ છે.  આવી જ રીતે હળવદમાં આવેલ શ્રી રામ ઇન્ડસ્ટ્રીઝમાં કામે રાખવામાં આવેલા મજૂરોના આઈડી પ્રૂફ લેવામાં આવ્યા ન હતા અને તેની માહિતી મોરબી એસયોર્ડ એપ્લિકેશનમાં અપલોડ કરવામાં આવી ન હતી જેથી સાગરભાઇ કાળુભાઈ વડગાસીયા (29) રહે. મેરૂપર તાલુકો હળવદ વાળા સામે હળવદ તાલુકા પોલીસ સ્ટેશન ખાતે ગુનો નોંધીને આગળની કાર્યવાહી કરેલ છે. તો હળવદમાં ક્રિષ્ના હોટલ પાછળના ભાગમાં નવા બનતા ગોડાઉનમાં કામ કરતા શ્રમિકોના આઈડી પ્રુફ લેવામાં આવ્યા ન હતા અને મોરબી એસયોર્ડ એપ્લિકેશનમાં તેની માહિતી અપલોડ કરી ન હતી જેથી વિનોદકુમાર બબઉરામ સોનકર (41) રહે. હાલ હળવદ માળિયા હાઇવે રોડ ક્રિષ્ના હોટલ પાછળ નવા બનતા ગોડાઉનમાં મૂળ રહે. યુપી વાળા સામે ગુનો નોંધી પોલીસ આગળની કાર્યવાહી હાથ ધરી છે