હે રામ: ટંકારાના રામપર ગામે માંડવામાં હાર્ટ એટેક આવી જતાં ભૂવાનું મોત

મોરબી જિલ્લાના જુદાજુદા વિસ્તારમાં ચિંતાજનક રીતે હાર્ટ એટેકના બનાવો બની રહ્યા છે ત્યારે મોરબી જિલ્લાના ટંકારા તાલુકાનાં નાના રામપર ગામે માતાજીના માંડવાનું આયોજન કરવામાં આવ્યું હતું તેમાં ધૂણતા ધૂણતા જ બહારથી આવેલા ભુવાને હાર્ટ એટેક આવી જતાં સારવાર માટે લઈને જતાં હતા ત્યારે તેનું મોત નીપજયું હતું 

બનાવની જાણવા મળતી માહિતી મુજબ ટંકારા તાલુકાના નાના રામપર ગામે માતાજીના માંડવાનું આયોજન કરવામાં આવ્યું હતું અને વાયક મળતા ખારચિયા ગામના ભુવા મોહનભાઈ પરબતભાઈ બોસીયા (૫૫) ત્યાં માતાજીનાં માંડવામા આવ્યા હતા અને ત્યાં ડાક ડમરના કાર્યક્રમમાં તે ધૂણતા હતા તે સમયે જ ભૂવાને હાર્ટ એટેક આવી ગયો હતો જેથી તેને તાત્કાલિક સારવાર માટે લઈ જતાં હતા ત્યારે રસ્તામાં તેનું મોત નીપજયું હતું અને આ બનાવની ટંકારા તાલુકા પોલીસને જાણ કરતાં પોલીસે આગળની કાર્યવાહી કરી હતી