મોરબી નજીકથી દારૂ ભરેલ ક્રેટા કાર સાથે 1 શખ્સ પકડાયો, 5.55 લાખનો મુદામાલ કબ્જે: 3 શખ્સોની શોધખોળ

વાંકાનેર તરફથી લાલપર થઈને મોરબી બાજુ ક્રેટા કાર આવી રહી હતી જેને તાલુકા પોલીસની ટીમે ચેક કરી હતી ત્યારે તે કારમાંથી 700 લિટર દેશી દારૂ મળી આવ્યો હતો જેથી પોલીસે દારૂ, કાર અને બે મોબાઈલ મળીને 5.55 લાખના મુદમાલ સાથે એક આરોપીની ધરપકડ કરેલ છે અને માલ મંગાવનારા 3 શખસોના નામ સામે આવેલ હોવાથી કુલ 4 શખ્સો સામે ગુનો નોંધાયો છે.

મોરબી વાંકાનેર નેશનલ હાઈવે રોડ ઉપર લાલપર ગામ પાસે તાલુકા પોલીસ સ્ટેશન પેટ્રોલીંગમાં હતી ત્યારે ત્યાંથી પસાર થઈ રહેલી સફેદ કલરની ક્રેટા કાર નંબર જીજે 10 સીજી 4630 ને રોકીને પોલીસ દ્વારા ચેક કરવામાં આવી હતી ત્યારે વાંકાનેર તરફથી લાલપર થઈને મોરબી બાજુ આવી રહેલ કારમાંથી દારૂનો મોટા પ્રમાણમાં જથ્થો મળી આવ્યો હતો જેથી કરીને પોલીસે 700 લીટર દેશી દારૂનો જથ્થો જેની કિંમત 1.40 લાખ તથા 4 લાખ રૂપિયાની ક્રેટા ગાડી, અને 15 હજાર રૂપિયાની કિંમતના 2 મોબાઈલ ફોન આમ કુલ મળીને 5.55 લાખ રૂપિયાની કિંમતના મુદ્દામાલને  કબજે કર્યો છે અને હાલમાં આરોપી સલીમભાઈ ઉર્ફે સલો બાબુભાઈ વિકિયાણી રહે. સરાયા તાલુકો ટંકારા વાળાની ધરપકડ કરવામાં આવેલ છે અને તેની પ્રાથમિક પૂછપરછમાં દારૂનો જથ્થો મંગાવનાર તરીકે ઈરફાન રહે. મોરબી, સદ્દામભાઈ જામ રહે. મોરબી તથા સલીમ ઉર્ફે રાહુલભાઈ પઠાણ રહે. મોરબી વાળાના નામ સામે આવ્યા હોય ચારેય સામે મોરબી તાલુકા પોલીસ સ્ટેશન ખાતે ગુનો નોંધવામાં આવ્યો છે અને બાકીના ત્રણ આરોપીને પકડવા માટેની તજવીજ ચાલી ગઈ છે આ કામગીરી મોરબી તાલુકા પોલીસ સ્ટેશનના પીઆઇ એન.એસ. ઘેટીયાની સૂચના મુજબ સ્ટાફ દ્વારા કરવામાં આવી હતી