વાંકાનેરના ભાયાતી જાંબુડીયા ગામે બાથરૂમ સાફ કરવાનું લિક્વિડ પી ગયેલ નવોઢાનું સારવારમાં મોત

વાંકાનેર તાલુકાના ભાયાતી જાંબુડીયા ગામે રહેતી  નવોઢાએ કોઈ કારણોસર બાથરૂમ સાફ કરવાનું લિક્વિડ પી લીધું હતું જેથી તેને સારવાર માટે પ્રથમ મોરબી અને ત્યારબાદ વધુ સારવાર માટે રાજકોટ સુધી લઈ ગયા હતા જો કે, સારવાર દરમિયાન તેનું મોત નીપજયું હતું જેથી આ બનાવની હોસ્પિટલ મારફતે વાંકાનેર તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી છે

વાંકાનેર તાલુકાના ભાયાતી જાંબુડીયા ગામે રહેતા હીનાબા યોગીરાજસિંહ ઝાલા (27) એ કોઈ કારણોસર ગત તા. 27/4 ના રોજ સાંજના છ વાગ્યાના અરસામાં પોતે પોતાના ઘરે હતા ત્યારે બાથરૂમ સાફ કરવાનું લિક્વિડ પી લીધું હતું જેથી તેને સારવાર માટે પ્રથમ મોરબીની મંગલમ હોસ્પિટલ ખાતે લઈને આવ્યા હતા અને ત્યારબાદ ત્યાંથી તેને વધુ સારવાર માટે રાજકોટની ખાનગી હોસ્પિટલમાં લઈ જવામાં આવ્યા હતા અને ત્યાં ચાલુ સારવાર દરમિયાન તે મહિલાનું મોત નીપજયું હતું જેથી આ બનાવની હોસ્પિટલ મારફતે વાંકાનેર તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી કરી છે અને વધુમાં પોલીસ પાસેથી મળતી વિગત પ્રમાણે મૃતક મહિલાનો લગ્ન ગાળો બે મહિનાનો હોય તેણે કયા કારણોસર આ અંતિમ પગલું ભર્યું તે દિશામાં આગળની વધુ તપાસ તાલુકા પોલીસ સ્ટેશનના પી.એસ.આઇ. ડી.વી.ખાંભલા ચલાવી રહ્યા છે

હળવદ અકસ્માત
હળવદના કવાડિયા ગામે રહેતા પરિવારનો અજય નવઘણભાઈ સલાટ નામનો ૧૩ વર્ષનો બાળક બાઇકમાંથી પડી જવાથી ઇજા પામ્યો હોય સારવાર માટે મોરબી લાવવામાં આવ્યો હતો.જ્યારે સુરજબારીના જેડાવાસ વિસ્તારમાં રહેતા સમીર રજાકભાઈ જેડા નામના ૨૦ વર્ષના યુવાન ઉપર સુરજબારી ખાતે કાળા કલરની સ્કોર્પિયો માથે ચડાવીને બે લોકો દ્વારા ધારિયા વડે હુમલો કરવાનો પ્રયાસ કરવામાં આવતા ઈજા પામેલ હોય સારવાર માટે મોરબી સિવિલે લાવવામાં આવ્યો હતો.

યુવાન સારવારમાં

મોરબી સુપર ટોકીઝ પાસે પગપાળા જતા સમયે ચક્કર આવતા પડી જવાથી અમિતભાઇ જનકભાઈ દવે (૪૫) રહે. રણછોડનગર નવલખી રોડ મોરબી ને સારવાર માટે લઈ જવામાં આવ્યા હતા.તેમજ મોરબીના શનાળા બાયપાસ ખાતે રહેતા રોશનબેન અકબરભાઇ અજમેરી (૪૬) અને અકબરભાઈ મહંમદભાઈ અજમેરી (૫૬) ને ઘર પાસે મારામારીના બનાવમાં ઈજા પહોંચી હોય બંનેને સારવાર માટે સિવિલે લાવવામાં આવ્યા હતા.બનાવની જાણ થતા એ ડિવિઝન પોલીસ મથકના વાલભા ચાવડા દ્વારા નોંધ કરીને તપાસ કરવામાં આવી હતી.