મોરબીમાં રિક્ષાના જોખમી સ્ટંટનો વિડીયો વાયરલ થતાં યુવાનની શાન ઠેકાણે લાવતી પોલીસ

સોશિયલ મીડિયાના યુગમાં વિડીયો ઉપર લાઈક અને વ્યુ મેળવવા માટે ઘણી વખત જોખમી સ્ટંટ કરવામાં આવતા હોય છે તેવી જ રીતે મોરબીમાં થોડા દિવસો પહેલા સર્કિટ હાઉસ પાસે ડાન્સ કરતી રિક્ષા અને તેમજ એલ.ઇ. ગ્રાઉન્ડમાં ડ્રાઈવર વગર ફરતી રિક્ષાનો વિડીયો બનાવવામાં આવ્યો હતો જે સોશિયલ મીડિયામાં વાયરલ થયો હતો જેને ધ્યાને લઈને પોલીસે તાત્કાલિક રીક્ષા ચાલકને પકડીને તેની સામે ગુનો નોંધી આગળની કાર્યવાહી કરી હતી

સામાન્ય રીતે બાઈક અને સાયકલ ઉપર સ્ટંટ કરતા હોય તેવા વિડિયો અગાઉ અનેક વખત સામે આવ્યા છે અને ખાસ કરીને મોરબીમાંથી પસાર થતાં નેશનલ હાઈવે રોડ ઉપર રાત્રિના સમયગાળા દરમિયાન બાઈકના સ્ટંટ કરતા હોય તેવા ઘણા વિડીયો બનેલ છે જે પોલીસને ધ્યાને આવે એટ્લે પોલીસ દ્વારા કાર્યવાહી પણ કરવામાં આવી હતી તેમ છતાં પણ જોખમી સ્ટંટ કરનારાઓ ઉપર બ્રેક લાગતી નથી તે હકીકત છે. તાજેતરમાં મોરબીના સોશિયલ મીડિયામાં જુદા જુદા રીક્ષા સ્ટંટના વિડીયો વાયરલ થયા હતા

જેમાં મોરબીમાં સર્કિટ હાઉસ પાસે આવેલા સર્વિસ રોડ ઉપરથી રીક્ષા ડાન્સ કરતા આગળ જતી હોય તે પ્રકારનું એક સ્ટંટનો વિડીયો હતો અને મોરબીના એલ.ઇ. ગ્રાઉન્ડમાં રિક્ષામાં ડ્રાઈવર ન હોય તો પણ રિક્ષા ફરતી હોય તે પ્રકારનો વિડીયો સોશિયલ મીડિયામાં જોવા મળ્યો હતો આ બંને વિડિયો પોલીસને ધ્યાન ઉપર આવતા રિક્ષા નંબર જીજે 36 ડબલ્યુ 3563 ના ચાલક કિશનભાઇ પોપટભાઈ કુંઢીયા (21) રહે. વેજીટેબલ રોડ ભીમસર મફતીયા પરા મોરબી વાળાને પકડીને તેની સામે બી ડિવિઝન પોલીસ સ્ટેશન ખાતે ગુનો નોંધી પોલીસે આગળની રાબેતા મુજબની કાર્યવાહી હાથ ધરી હતી