મોરબીના રવાપર ગામના ખેડૂત સાથે કરાયેલ હનીટ્રેપના ગુનામાં પકડાયેલ વધુ બે આરોપી જેલ હવાલે

મોરબીમાં ખેડૂતને હનીટ્રેપનો શિકાર બનાવીને તેને બળાત્કાર અને છેડતીના કેસમાં ફસાવી દેવાની ધમકી આપી હતી અને ત્યાર બાદ તેની પાસેથી સોનાના ચાર બિસ્કીટ, રોકડા 1 લાખ તેમજ અઢી તોલાનો સોનાનો ચેન આમ કુલ મળીને 53.50 લાખનો મુદામાલ પડાવી લેવામાં આવ્યો હતો જેથી ખેડૂત્તે મોરબી એ ડિવિઝન પોલીસ સ્ટેશનમાં ફરિયાદ નોંધાવેલ હતી જે ગુનામાં પોલીસે વધુ બે આરોપીને પકડીને રિમાન્ડ ઉપર લીધા હતા અને રિમાન્ડ પૂરા થતાં બંને આરોપીને કોર્ટમાં રજૂ કરીને જેલ હવાલે કરવામાં આવેલ છે.

મોરબીના રવાપર ગામે રહેતા આધેડ ખેડૂતે મોરબી એ ડિવિઝન પોલીસ સ્ટેશન ખાતે થોડા દિવસો પહેલા એક મહિલા સાહિત કુલ મળીને આઠ શખ્સોની સામે હનીટ્રેપની ફરિયાદ કરી હતી જેમાં તેઓએ જણાવ્યુ હતું કે, ખેતી કામની જરૂર છે તેવું કહીને ખુશી નામની મહિલાએ ફોન કર્યો હતો ત્યાર બાદ તે મોરબીમાં આવેલ ઉમિયા સર્કલ પાસે આવી હતી અને ત્યાર બાદ ફરિયાદી તેને વાડીએ લઈ ગયા હતા. ત્યારે વાડીએ પહોંચીને તે મહિલાએ પોતાના કપડાં કાઢીને ફરિયાદીને બથ ભરી લીધી હતી. તેવામાં બીજા આરોપીઓ ત્યાં આવ્યા હતા અને ફરિયાદી તેમજ મહિલાના ફોટા અને વીડીયા બનાવી લીધા હતા. જેને વાયરલ કરવાની અને બળાત્કાર તેમજ છેડતીના કેસમાં ફિટ કરી દેવાની ફરિયાદીને ધમકી આપી હતી.

ત્યાર બાદ ફરિયાદી પાસેથી 4 સોનાના બિસ્કીટ, અઢી તોલાનો સોનાનો ચેન, 1 લાખ રોકડા રૂપિયા આમ કુલ મળીને 53,50,000 નો મુદામાલ પડાવી લેવામાં આવેલ હતો અને વધુ રૂપિયા પડાવવા માટે ફરિયાદીનું અપહરણ કરીને ગોંધી રાખીને ધમકીઓ આપી હતી. જે ગુનામાં પહેલા પોલીસે મહિલા સહિત કુલ આઠ આરોપીને ક્રમશઃ પકડ્યા હતા અને તે આરોપીઓ જેલમાં છે તેવામાં એએસઆઇ એ.વી. દાફડા અને તેના સ્ટાફ દ્વારા આરોપી મનીષ ઉર્ફે બલ્લી જગાભાઈ ગરીયા (21) રહે. રતનપર તાલુકો ગઢડા અને લાલભાઈ ઉર્ફે ટકો માધાભાઇ બાવળીયા (30) રહે. પ્લોટ વિસ્તાર બોટાદ વાળાની ધરપકડ કરેલ છે અને તે બંને આરોપીઓને કોર્ટમાં રજૂ કરીને રિમાન્ડ મેળવ્યા હતા જે રિમાન્ડ પૂરા થતાં બંને આરોપીઓને ફરી કોર્ટમાં રજૂ કરીને જેલ હવાલે કરવામાં આવેલ છે.