મોરબીમાં યુવાન પાસે વ્યાજના 10.24 લાખની પઠાણી ઉઘરાણી કરનાર બે શખ્સ પકડાયા

મોરબીમાં રહેતા યુવાને ઘર લેવા માટે રૂપિયાની જરૂર હોવાથી વ્યાજે રૂપિયા લીધેલ હતા અને લીધેલા રૂપિયા કરતાં વધુ રૂપિયા પાછા આપી દીધેલ હતા તો પણ લીધેલ રકમના ત્રણ ગણા રૂપિયા તેની પાસેથી માંગતા હતા અને રૂપિયા કઢાવવા માટે તેને માર મારવાની ધમકી આપવામાં આવી હતી જેથી યુવાને નોંધાવેલ ફરિયાદ આધારે પોલીસે આરોપીને પકડીને કાર્યવાહી કરેલ છે.

મૂળ લખતર તાલુકાના કેસરિયા ગામના રહેવાસી અને હાલમાં મોરબીના પંચાસર રોડ ઉપર આવેલ શ્યામ સોસાયટીમાં રહેતા વાળંદ કામ કરતાં વેપારી યુવાન  કમલેશભાઈ ઉર્ફે મહેશભાઈ મનુભાઈ માંડવીયા (46)એ મોરબી તાલુકા પોલીસ સ્ટેશન ખાતે હર્ષદભાઈ અમરશીભાઈ લીખિયા રહે. ઉમા ટાઉનશિપ મોરબી તથા લાલાભાઇ રહે. હરભોલે પાન મહેન્દ્રનગર ચોકડી મોરબી વાળાની સામે ફરિયાદ કરી હતી કે, તેને મકાન ખરીદવા માટે રૂપિયાની જરૂર હોય હર્ષદભાઈ લિખિયા પાસેથી માસિક 3 ટકા લેખે 3 લાખ રૂપિયા લીધેલા હતા જેની સામે તેમણે 3.45 લાખ રૂપિયા મૂડી તથા વ્યાજના ચૂકવી દીધેલ છે તેમ છતાં પણ ફરિયાદીને આરોપીએ લક્ષ્મીનાગર ગામ પાસે આવેલ તેની દુકાને બોલાવી રૂપિયાની ઉઘરાણી કરી હતી અને મૂડી તથા વ્યાજ મળીને હજુ 10,24,350 રૂપિયા આપવાના છે તેવું કહીને લીસ્ટ ફરિયાદીના ફોનમાં વ્હોટ્સએપથી મોકલ્યું હતું ત્યારબાદ લાલાભાઇએ ફોન કરીને હર્ષદભાઈના વ્યાજે આપેલા રૂપિયાની બળજબરીથી ઉઘરાણી કરી હતી અને માર મારવાની ધમકી આપેલ હતી જે ફરિયાદ આધારે પોલીસે આ ગુનામાં હર્ષદભાઈ અમરશીભાઈ લીખિયા (44) રહે. ઉમા ટાઉનશિપ મોરબી તથા વિપુલભાઈ ઉર્ફે લાલાભાઇ ભગવાનજીભાઈ વિડજા (35) રહે. મહેન્દ્રનગર વાળાને પકડીને આગળની કાર્યવાહી કરેલ છે.

વૃદ્ધ સારવારમાં

ટંકારાના મોટા ખીજડીયા ગામે દરબારગઢ નજીક રહેતા કુલદીપસિંહ જુવાનસિંહ ઝાલા (ઉમર ૭૯) બાઈકમાં બેસીને જતા હતા ત્યારે મોટા ખીજડીયા ગામ પાસે આવેલ રોયલ પોલિપેક નામના કારખાના નજીક બાઇક સ્લીપ થઈ જવાના બનેલ અકસ્માત બનાવમાં ઇજાઓ થઈ હતી.જેથી સારવાર માટે મોરબી લાવવામાં આવ્યા હતા.મોરબી પોલીસે પ્રાથમિક તપાસ કરીને બનાવ અંગે ટંકારા પોલીસને જાણ કરી હતી.તેમજ મોરબીના સામાકાંઠે માળિયા ફાટક પાસેથી બાઈક લઈને જતા પ્રતાપ જામસંગ મંડલ (ઉમર ૨૪) રહે.જેતપર રોડ પાવળીયારી કેનાલ પાસે મોરબી વાળાને અજાણ્યા ટ્રક ચાલકે પાછળથી હડફેટે લીધો હતો.જેથી ઈજા પામેલ પ્રતાપ મંડલ નામના પરપ્રાંતીય યુવાનને ૧૦૮ વડે સારવાર માટે લાવ્યા હતા.બનાવને પગલે જાણ થતા બી ડિવિઝન પોલીસ મથકના એચ.એમ.મકવાણા દ્વારા નોંધ કરીને તપાસ કરવામાં આવી હતી.

દવા પી જતા બાળક સારવારમાં

મોરબી જિલ્લાના હળવદ તાલુકાના સરંભડા ગામે કોઈ કારણોસર દિપક ભાવસંગભાઈ વાસ્કલ નામનો ૧૫ વર્ષનો સગીર દવા પી ગયો હતો.જેથી મોરબી સરકારી હોસ્પિટલએ સારવાર માટે લાવવામાં આવ્યો હતો.જ્યારે મોરબીના હળવદ રોડ ઉપર નીચી માંડલ ગામ પાસે રોડ અકસ્માતના બનાવમાં ઈજા થતાં રિયા નવજીતભાઈ શર્મા નામની આઠ વર્ષની બાળકીને મોરબી સારવાર માટે લાવ્યા હતા જેની પોલીસને જાણ કરી છે.