ટંકારાના સજનપર નજીકથી દેશી બનાવટની સિંગલ બેરલની બંદૂક સાથે એકની ધરપકડ

ટંકારા તાલુકાના સજનપર ગામેથી પંચાસિયા જવાના રસ્તા ઉપર આવેલ મંદિર નજીકથી પસાર થઈ રહેલા શખ્સને રોકીને પોલીસ દ્વારા ચેક કરવામાં આવ્યો હતો ત્યારે તેની પાસેથી દેશી બનાવટની સિંગલ બેરલની બંદૂક મળી આવી હતી જેથી પોલીસ હથિયાર સાથે તેની ધરપકડ કરી હતી અને ટંકારા તાલુકા પોલીસ સ્ટેશન ખાતે ગુનો નોંધી આગળની કાર્યવાહી હાથ ધરી છે

જાણવા મળતી માહિતી મુજબ ટંકારા તાલુકા પોલીસની ટીમ પેટ્રોલિંગમાં હતી ત્યારે સજનપર ગામથી પંચાસિયા ગામ તરફ જવાના રસ્તા ઉપર આવેલ રામદેવપીરના મંદિર પાસેથી પસાર થઈ રહેલા વૃદ્ધને રોકીને પોલીસ દ્વારા ચેક કરવામાં આવતા તેની પાસેથી દેશી બનાવટની સિંગલ બેરલની લાકડાની બંદૂક મળી આવી હતી જેથી પોલીસે હથિયાર કબજે કર્યું હતું અને આરોપી ધનજીભાઈ દેવાભાઈ ધોળકિયા (63) રહે. સજનપર તાલુકો ટંકારા વાળાની ધરપકડ કરી હતી અને તેની સામે ટંકારા તાલુકા પોલીસ સ્ટેશન ખાતે ગુનો નોંધવામાં આવ્યો છે

મહિલાને માર માર્યો

મોરબીમાં સર્કિટ હાઉસની સામેના ભાગમાં આવેલ વિદ્યુતનગર વિસ્તારમાં રહેતા રેખાબેન દીપકભાઈ ડાભી (25) નામની મહિલાને તેના પતિએ માર માર્યો હતો જેથી ઈજા પામેલ મહિલાને સારવાર માટે સિવિલે લઈને આવ્યા હતા અને ત્યાં સારવાર આપીને સિવિલ હોસ્પિટલ મારફતે આ બનાવની મોરબી બી ડિવિઝન પોલીસને જાણ કરતા પોલીસે બનાવી નોંધ કરી આગળની કાર્યવાહી હાથ ધરી છે

વૃદ્ધા સારવારમાં

મોરબીમાં ગુજરાત હાઉસિંગ બોર્ડમાં રહેતા ગૌરીબેન નંદલાલભાઈ (75) નામના વૃદ્ધા તેઓના વિસ્તારમાંથી બાઇકમાં પાછળના ભાગે બેસીને પસાર થતા હતા ત્યારે હનુમાન મંદિર નજીકથી તેઓ બાઈકમાંથી નીચે પડી જતા તેમને ઈજા થઇ હતી જેથી તેને સારવાર માટે મોરબીની ખાનગી હોસ્પિટલમાં લાવ્યા હતા અને ત્યાં તેને સારવાર આપીને આ બનાવની મોરબી બી ડિવિઝન પોલીસને જાણ કરવામાં આવતા પોલીસે બનાવી નોંધ કરી આગળની કાર્યવાહી હાથ ધરી છે