ટંકારાના લખધિરગઢ ગામેથી વડોદરા જવાનું કહીને યુવાન ગુમ

ટંકારા તાલુકાના લખધિરગઢ ગામે રહેતો યુવાન ઘરેથી વડોદરા કામ હોવાથી જવાનું કહીને નીકળ્યો હતો ત્યારબાદ તેનો મોબાઇલ ફોન પણ બંધ આવી રહ્યો છે અને તે ગુમ થઈ ગયો છે જેથી છેલ્લા પાંચ દિવસથી યુવાન ગુમ હોય તેના પિતાએ ટંકારા તાલુકા પોલીસ સ્ટેશન ખાતે ગુમસુધા ફરિયાદ નોંધાવેલ છે જેના આધારે પોલીસે ગુમ થયેલા યુવાનને શોધવા માટે તજવીજ હાથ ધરી છે

જાણવા મળતી માહિતી મુજબ ટંકારા તાલુકાના લગધીરગઢ ગામે રહેતા અમરશીભાઈ ડાયાભાઈ ઢેઢી જાતે પટેલ (60)એ હાલમાં ટંકારા તાલુકા પોલીસ સ્ટેશન ખાતે તેનો દીકરો વિજયભાઈ અમરશીભાઈ ઢેઢી જાતે પટેલ (32) ગુમ થયો હોવા અંગેની ગુમસુધા ફરિયાદ ટંકારા તાલુકા પોલીસ સ્ટેશન ખાતે નોંધાવી છે જેમાં તેને જણાવ્યુ છે કે, ગત તા. 18/6/24 ના રોજ સવારે આઠેક વાગ્યાના અરસામાં તેનો દીકરો દિગ્વિજયભાઈ ઢેઢી ઘરેથી વડોદરા કામ હોવાથી ત્યાં જાય છે તેવું કહીને નીકળ્યો હતો અને ત્યારબાદ તેનો કોઈ જગ્યાએથી પતો લાગ્યો નથી અને તેનો મોબાઇલ ફોન પણ બંધ આવી રહ્યો છે જેથી કરીને ગુમ થયેલા યુવાનના પિતાએ નોંધાવેલ ગુમસુધા ફરિયાદના આધારે પોલીસે ગુમ થયેલા યુવાન દિગ્વિજયભાઈ ડેઢીને શોધવા માટે થઈને જુદી જુદી દિશામાં તપાસ શરૂ કરી છે અને આ અંગેની આગળ વધુ તપાસ આઇ.ટી. જામ ચલાવી રહ્યા છે.