માળીયા (મી)ના ભાવપર ગામ પાસે બાળવાની જાળીમાંથી ૧૫૦ બોટલ દારૂ સાથે એકની ધરપકડ, એક શખ્સની શોધખોળ

માળીયા મીયાણા તાલુકાના ભાવપર ગામની સીમમાં સુજલોન કંપનીની પવનચક્કીની ઓફિસની સામેના ભાગમાં બાવળીની જાળીમાં પોલીસે દારૂની રેડ કરી હતી ત્યારે સ્થળ ઉપરથી દારૂની નાની અને મોટી ૧૫૦ બોટલો મળી આવતા પોલીસે ૫૫,૫૦૦ ની કિંમતના મુદ્દામાલને કબજે કર્યો હતો અને એક શખ્સની ધરપકડ કરેલ છે અને કચ્છ જિલ્લાના એક શખ્સનું નામ સામે આવ્યું હોય તેને પકડવા માટે તજવીજ શરૂ કરવામાં આવી છે

બનાવની જાણવા મળતી માહિતી પ્રમાણે મોરબી જિલ્લા એલસીબીની ટીમ પેટ્રોલિંગમાં હતી ત્યારે માળિયા મીયાણા તાલુકાના ભાવપર ગામની સીમમાં આવેલ સુજલોન કંપનીની પવન ચક્કીની ઓફિસની સામેના ભાગમાં બાવળની જાળીમાં દારૂનો જથ્થો હોવાની ચોક્કસ હકીકત મળી હતી જેના આધારે પોલીસે ત્યાં દારૂની રેડ કરી હતી ત્યારે સ્થળ ઉપરથી દારૂની નાની મોટી કુલ મળીને ૧૫૦ બોટલો મળી આવતા પોલીસે કુલ મળીને ૫૫,૫૦૦ ની કિંમતના મુદ્દામાલ સાથે સાગરભાઇ રામૈયાભાઈ સવસેટા જાતે આહિર (૨૮) રહે રામજી મંદિર વાળી શેરી વવાણીયા તાલુકો માળીયા મીયાણા વાળો મળી આવતા પોલીસે તેની ધરપકડ કરી હતી અને તેની પાસેથી વશરામભાઈ રબારી રહે. ગાંધીધામ જિલ્લો કચ્છ વાળાનું નામ સામે આવતા પોલીસે તેની સામે પણ ગુનો નોંધી તેને પકડવા માટે તજવીજ શરૂ કરી છે

દેશી દારૂનો આથો

મોરબી સીટી એ ડિવિઝન પોલીસની ટીમ દ્વારા વાવડી રોડ ઉપર આવેલ ગૌશાળાની સામેના ભાગમાં ઝૂપડામાં દારૂની રેડ કરી હતી ત્યારે સ્થળ ઉપરથી દેશી દારૂ બનાવવા માટે ઉપયોગમાં લેવામાં આવતો ૫૦૦ લિટર આથો મળી આવ્યો હતો જેથી કરીને પોલીસે ૧૦૦૦ ની કિંમતનો મુદ્દા માલ કબજે કરી દેવુબેન રાણીંગાભાઈ વાઘેલા જાતે દેવીપુજક (૪૦) રહે. શક્તિધામ મંદિર પાસે ઝૂંપડામાં વાવડી રોડ મોરબી વાળીની ધરપકડ કરી આગળની રાબેતા મુજબની કાર્યવાહી હાથ ધરી હતી