મોરબીના અમરાપર ગામે રીક્ષા પલ્ટી મારી જતા ત્રણને ઇજા

15-02-2022 11:21 AM

મોરબીના અમરાપર ગામે રીક્ષા પલ્ટી મારી જતા ત્રણને ઇજા

મોરબી તાલુકાના અમરાપર ગામે મોમાઈ માતાના મંદિર પાસે રિક્ષા પલ્ટી મારી જવાનો અકસ્માત બનાવ બન્યો હતો જે બનાવમાં ઇજાઓ થવાથી દિનેશ નરસીભાઈ સાવરીયા રહે.જવાહર સોસાયટી ભડીયાદ રોડ, જીગ્નેશ હરજીવન સાવરીયા (૨૮) અને નિર્મળાબેન વિનોદભાઈ સાવરીયા (૨૬) ને ઈજાઓ થઈ હતી જેથી તેઓને સારવાર માટે અહીંની આયુષ હોસ્પિટલે લાવવામાં આવ્યા હતા.પોલીસે બનાવની નોંધ કરી આગળની તપાસ હાથ ધરી છે.જ્યારે વાંકાનેર તાલુકામાં આવેલા ઢુવામાં સદભાવ સીરામીક નજીક થયેલ મારામારીના બનાવમાં ઇજાઓ થવાથી શશી શીવકુમાર યાદવ નામના ૩૫ વર્ષીય યુવાનને સારવાર માટે મોરબી સિવિલે લાવવામાં આવ્યો હતો જેથી મોરબી એ ડીવીઝન પોલીસે પ્રાથમિક તપાસ કરીને બનાવ સંદર્ભે વાંકાનેર તાલુકા પોલીસને જાણ કરી હતી.

બાળક સારવારમાં

ધ્રાંગધ્રાના કોંઢ ગામે રહેતો જયદીપસિંહ ખુમાણસિંહ ચૌહાણ નામનો ૧૨ વર્ષીય બાળક પોતાના કાકાની સાથે બાઈકમાં જતો હતો ત્યારે કોંઢ ગામે એસાર પંપ નજીક તેઓનું બાઇક સ્લીપ થઇ જતાં જયદીપસિંહ પડી જતા તેને સારવાર માટે અત્રેની સિવિલ હોસ્પિટલે લાવવામાં આવેલ જે અંગે પ્રાથમિક તપાસ કરીને મોરબી પોલીસે ધાંગધ્રા પોલીસને બનાવની જાણ કરી હતી. જ્યારે માળીયા મિંયાણામાં જુલેખાપીરની દરગાહ નજીક રહેતો અસગરઅલી જાકબભાઇ જેડા નામનો ૨૦ વર્ષીય યુવાન બાઈકમાં જતો હતો ત્યારે બાઇક સ્લીપ થઇ જતાં ઈજાગ્રસ્ત અસગરઅલીને મોરબી સિવિલે સારવારમાં લાવવામાં આવ્યો હતો.

વાહન અકસ્માતમાં ઈજા

મોરબીના સામાકાંઠે ભીમસરમાં રહેતા ધમુબેન કિશનભાઇ નામની ૨૮ વર્ષીય મહિલા શહેરના સામાકાંઠે માળીયા ફાટક પાસેથી રેકડી લઈને જતા હતા ત્યારે અજાણ્યા બાઇક ચાલકે તેમને હડફેટે લેતા ઇજા થવાથી ધમુબેનને સારવારમાં ખસેડાયા હતા.જ્યારે મોરબીના સામાકાંઠે ઇન્દિરાનગર વિસ્તારમાં રહેતો મુકેશ બટુકભાઈ મકવાણા નામનો ૩૮ વર્ષીય યુવાન સામાકાંઠે વેજીટેબલ રોડ અને ધરમપુર વચ્ચેથી બાઈક લઈને જતો હતો તે દરમિયાનમાં બાઇક સ્લીપ થતાં ઇજાગ્રસ્ત મુકેશ મકવાણાને અહીંની આયુષ હોસ્પિટલે ખસેડાયો હતો.તેમજ મોરબીના હળવદ હાઈવે ઉપર ઉંચી-નીચી માંડલ વચ્ચેથી બાઈક સ્લીપ થવાના બનેલ અકસ્માતના બનાવમાં ઇજાઓ થવાથી વિશાલ પ્રવીણ એરવાડીયા (૩૦) રહે.ઉમા રેસીડેન્સી ઘુંટુ રોડ મોરબી-૨ વાળાને ઇજાઓ થતાં તેને પણ સારવારમાં લેવામાં આવ્યો હતો.