હળવદના ચરાડવા ગામે ભાગવતાચાર્ય રમેશભાઈ ઓઝાના હસ્તે પદ્મશ્રી ડૉ. એચ.એલ.ત્રિવેદી પુસ્તકાલયનું લોકાર્પણ કરાયું

હળવદના ચરાડવા ગામના પનોતા પુત્ર તથા કિડની ક્ષેત્રે પોતાની અમૂલ્ય સેવાઓથી દેશ-વિદેશમાં નામના મેળવનાર પદ્મશ્રી ડૉ. એચ.એલ.ત્રિવેદીની સ્મૃતિને ચિરંજીવ રાખવાના હેતુથી “પદ્મશ્રી ડૉ. એચ.એલ.ત્રિવેદી પુસ્તકાલય” બનાવવામાં આવ્યું છે જેનું ભાગવતાચાર્ય રમેશભાઈ ઓઝાના હસ્તે લોકાર્પણ કરવામાં આવ્યું હતું ત્યારે સાંસદ, ધારાસભ્ય સહિતના રાજકીય અને સમાજિક આવેગવાનો અને બહોળી સંખ્યામાં ગામના લોકો હાજર રહ્યા હતા.

ચરાડવા ગામે જન્મેલા પદ્મશ્રી ડૉ. એચ.એલ. ત્રિવેદી કિડની રોગથી પીડિત દર્દીઓની સેવા માટે પોતાનું જીવન સમર્પિત કર્યું હતું. અને ખાસ કરીને વિદેશની સુખ-સુવિધા અને ધીકતી કમાણીનો ત્યાગ કરી ભારત પરત ફરી અમદાવાદમાં કિડની હોસ્પિટલની સ્થાપના કરી તેમણે તબીબી ક્ષેત્રે તેમજ માનવસેવામાં અનોખું યોગદાન આપ્યું હતું. ત્યારે તેઓના પરિવાર દ્વારા ચરાડવા ગામે આવેલા તેઓના મકાનને લોક હિત માટે આપવાનો નિર્ણય કર્યો હતો અને પદ્મશ્રી ડૉ. જગદીશભાઈ ત્રિવેદી દ્વારા ત્યાં 11 મું પુસ્તકાલય બનાવવામાં આવ્યું છે જેને ભાગવતાચાર્ય ભાઇશ્રી રમેશભાઈ ઓઝાના હસ્તે લોકાર્પણ કરવામાં આવ્યું છે ત્યારે સાસંદ ચંદુભાઈ શિહોરા, ધારાસભ્ય પ્રકાશભાઈ વરમોરા તેમજ સુનિતાબેન એચ. ત્રિવેદી, શાહબુદીનભાઈ રાઠોડ સહિતના રાજકોય અને સમાજિક આગેવાનો હાજર રહ્યા હતા.

આ તકે ભાઇશ્રી રમેશભાઈ ઓઝાએ કહ્યું હતું કે, પદ્મશ્રી ડૉ. એચ.એલ. ત્રિવેદીના જન્મ સ્થાનમા પદ્મશ્રી ડૉ. જગદીશભાઈ ત્રિવેદીના સહયોગથી ગ્રંથાલય બનાવવામાં આવ્યું છે ત્યારે ત્રિવેદી સાહેબ જેવી ચેતનાના આશીર્વાદ હોય તો રાષ્ટ્ર, માનવતા અને સમાજને તે ઉપયોગી થઈ શકે છે. ખાસ કરીને ગ્રામ્ય વિસ્તારમાં જ્ઞાનનો પ્રકાશ ફેલાય, વિદ્યાર્થીઓ અને યુવાનોમાં વાંચનની ટેવ વિકસે તથા નવી પેઢીને જ્ઞાન અને સંસ્કાર સાથે જોડવાના હેતુથી આ પુસ્તકાલયનું નિર્માણ કરવામાં આવ્યું છે. તો પદ્મશ્રી ડૉ. જગદીશભાઈ ત્રિવેદીએ કહ્યું હતું કે, દરેક ગામમાં પાંચ “લય” હોવા જોઈએ જેમાં દેવાલય, વિદ્યાલય, ભોજનાલય, ઔષધાલય અને પુસ્તકાલય નો સમાવેશ થાય છે અને આ પાંચેય વસ્તુઓથી ગામના લોકોને અદ્ભુત ફાયદો થાય છે અને આ પદ્મશ્રી ડૉ. એચ.એલ. ત્રિવેદીના જન્મ સ્થાનમા પુસ્તકાલયબનાવવા માટેનું મને સૌભાગ્ય મળ્યું તેના માટે હું ત્રિવેદી પરિવારનો આભાર વ્યક્ત કરું છું. ઉલેખનીય છે કે, “પદ્મશ્રી ડૉ. એચ.એલ. ત્રિવેદી પુસ્તકાલય”નું નિયમિત સંચાલન જય શ્રી રામ ગૌશાળા ચરાડવા દ્વારા કરવામાં આવશે.