વાંકાનેરના રાતીદેવરી ગામે પિતાની દુકાનના પગથીયા પાસે બેઠેલા વૃદ્ધને પથ્થરના ઘા ઝીકયા

વાંકાનેરના રાતીદેવરી ગામે વૃદ્ધ પોતાના પિતાની દુકાનના પગથીયા પાસે બેઠેલા હતા ત્યારે ત્યાં હાથમાં લાકડાના ધોકા લઈને આવેલા બે શખ્સ આવ્યા હતા અને ત્યાં હાજર રહેલા એક વ્યક્તિને બેફામ ગાળો આપી હતી અને બાદમાં બજારમાં પડેલા પથ્થરના છૂટા ઘા કર્યા હતા ત્યારે વૃદ્ધને મોઢા, ડાબી આંખ અને નાક પાસે પથ્થર લાગ્યા હતા જેથી તેઓને નાકમાં ફ્રેકચર જેવી ઈજા થયેલ છે અને મોઢા તથા આંખ પાસે પણ ઇજા થતાં તેને સારવાર માટે હોસ્પિટલે લઇ ગયા હતા અને ત્યારબાદ વૃદ્ધે નોંધાવેલ ફરિયાદ આધારે પોલીસે હાલમાં ગુનો નોંધી આરોપીને પકડવા માટે તજવીજ શરૂ કરેલ છે

વાંકાનેર તાલુકાના જૂની રાતીદેવરી ગામે રહેતા અમૃતભાઈ મેઘજીભાઈ વોરા (63)એ હાલમાં વાંકાનેર સિટી પોલીસ સ્ટેશન ખાતે પ્રકાશ ઉર્ફે પીન્ટુભાઇ લાલજીભાઈ વોરા અને ભરત ઉર્ફે ગોપી લાલજીભાઈ વોરા રહે. બંને રાતીદેવરી વાળા સામે ફરિયાદ નોંધાવેલ છે જેમાં જણાવ્યુ છે કે, ફરિયાદી તેના પિતાની દુકાનના પગથીયા પાસે બેઠા હતા ત્યારે બંને આરોપીઓ હાથમાં લાકડીના ધોકા લઈને આવ્યા હતા અને ત્યાં હાજર રહેલ સાહેદ બાવજીભાઇ વોરાને બેફામ ગાળો આપી હતી અને બાદમાં તેને મારવા માટે જાહેરમાં પડેલ પથ્થરના છુટા ઘા કર્યા હતા ત્યારે ફરિયાદીને મોઢા, આંખ પાસે અને નાક ઉપર પથ્થરના ઘા વાગ્યા હતા જેથી તેઓને ડાબી આંખ નીચેના ભાગમાં અને મોઢા ઉપર ઇજા થઈ હતી જયારે નાકમાં ફ્રેકચર જેવી ઇજા થયેલ હોય તેઓને સારવાર માટે હોસ્પિટલે લઈ ગયા હતા અને આ બનાવ બાદ બંને આરોપીઓ સ્થળ ઉપરથી નાસી ગયેલ હોય આ બનાવ સંદર્ભે હાલમાં વૃદ્ધે નોંધાવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે