તું અમને જોઈતી નથી અને તને રાખવી નથી તેવું પતિએ કહેતા ટંકારામાં પરિણીતા એસિડ પી ગઈ: 5 સામે ફરિયાદ

ટંકારા ખાતે રહેતી પરણીતાને તેના પતિએ તું અમને જોઈતી નથી અને તને રાખવી નથી તેવું કહીને માનસિક ત્રાસ આપવામાં આવતો હતો તેમજ તેના સાસુ સસરા અને બે નણંદ દ્વારા અપમાનજનક વર્તન કરવામાં આવતું હતું જેથી કરીને પરિણીતાએ એસિડ પી લીધું હતું માટે તેને સારવારમાં લઈ ગયા હતા અને ત્યારબાદ મહિલાના પિતાએ તેઓના જમાઈ અને તેના માતા પિતા તેમજ બે બહેનની સામે મોરબી જિલ્લા મહિલા પોલીસ સ્ટેશન ખાતે ફરિયાદ નોંધાવી છે જેથી હાલમાં પોલીસે ગુનો નોંધી આગળની રાબેતા મુજબની કાર્યવાહી હાથ ધરી છે

જોડિયા તાલુકાના બાલંભા ગામના રહેવાસી નટવરલાલ દેવશીભાઈ ચોથાણી (62)એ હાલમાં મોરબી મહિલા પોલીસ સ્ટેશન ખાતે તેના મંથનભાઈ જીતેન્દ્રભાઈ ઘેટીયા, જીતેન્દ્રભાઈ ઘેટીયા, રમાબેન ઘેટીયા, અવંતિકાબેન ઘેટીયા થા જિજ્ઞાસાબેન ઘેટીયા સામે ફરિયાદ નોંધાવેલ છે જેમાં જણાવ્યું છે કે તેઓની દીકરી પૂજાના લગ્ન મંથનભાઈ સાથે થયા હતા અને મંથનભાઈ તેમજ તેની બે બહેન અવંતિકાબેન અને જિજ્ઞાસાબેન તેમજ માતા રમાબેન અને પિતા જીતેન્દ્રભાઈ દ્વારા અવારનવાર કામકાજ બાબતે તથા પ્રસંગમાં જવા બાબતે ફરિયાદીની દીકરીને મેણાં ટોણા મારીને માનસિક ત્રાસ આપવામાં આવતો હતો અને ફરિયાદીની દીકરીને તેના પતિ દ્વારા “તું અમને જોઈતી નથી, તને રાખવી નથી” તેવું કહીને માનસિક ત્રાસ આપવામાં આવતો હતો જ્યારે અન્ય આરોપીઓ દ્વારા ફરિયાદીની દીકરી સાથે અપમાનજનક વર્તન કરી ઝઘડો કરવામાં આવતો હતો જેથી કંટાળી જઈને ફરિયાદીની દીકરીએ એસિડ પી લેતા તેને સારવાર માટે હોસ્પિટલે લઇ ગયા હતા અને ત્યારબાદ હાલમાં મહિલાના પિતાએ નોંધાવેલ ફરિયાદ આધારે પોલીસે કુલ પાંચ વ્યક્તિઓ સામે ગુનો નોંધીને આગળની કાર્યવાહી હાથ ધરી છે.