મોરબીમાં વધુ એક જમીન કૌભાંડ સામે આવ્યું છે જેમાં મોરબીમાં રહેતા યુવાનને ખોટું નામ ધારણ કરીને તેમજ ખોટા આધારકાર્ડ, પાનકાર્ડ અને ચૂંટણીકાર્ડ બનાવીને તેનો ખરા તરીકે ઉપયોગ કરીને વિશ્વાસમાં લેવામાં આવેલ હતો અને જમીનનો સોદો કરવાના નામે તેની પાસેથી 1,11,000 રૂપિયા પડાવી લેવામાં આવ્યા હતા અને ખોટા દસ્તાવેજનો ખરા તરીકે ઉપયોગ કરી તે યુવાનની સાથે વિશ્વાસઘા અને છેતરપિંડી કરવામાં આવી છે જેથી ભોગ બનેલા યુવાને જમીનના દલાલો સહિત કુલ 6 શખ્સોની સામે મોરબી એ ડિવિઝન પોલીસ સ્ટેશન ખાતે ફરિયાદ નોંધાવી હતી જે પૈકીના પાંચ આરોપીઓને પકડીને પોલીસ આગળની રાબેતા મુજબની કાર્યવાહી કરેલ છે.

મોરબીના રવાપર રોડ ઉપર આવેલ કાલિકા પ્લોટમાં મોમાઈ કેન્ડીની બાજુમાં રહેતા જીગરભાઈ રજાકભાઈ ડોસાણી (42)એ મોરબી એ ડિવિઝન પોલીસ સ્ટેશન ખાતે દયારામભાઈ પુંજાભાઈ ડાભી (61) રહે. ભક્તિનગર સર્કલ પાસે રાતડીયાની વાડી મોરબી, મુકેશભાઈ નારણભાઈ કંઝારીયા (42) રહે. કૈલાશ પાર્ક સોસાયટી કંડલા બાયપાસ રોડ મોરબી, અલતાફભાઈ વલીભાઈ કોરડીયા (43) રહે. કરાચી કોલોની બીવી પરખાણી સ્કૂલ સામે હળવદ, બળદેવભાઈ જાદવજીભાઈ વરસડા (68) રહે. સોલડી, કાંતિભાઈ છગનભાઈ કાવર (52) રહે, બેસાબગઢ પટેલ વાસ તાલુકો ધાંગધ્રા અને કાળુભાઈ લખમણભાઇ ગોલતર રહે. બેસાબગઢ ભરવાડ વાસ ધાંગધ્રા વાળા સામે ફરિયાદ નોંધાવેલ છે જેમાં તેણે જણાવ્યું છે કે અલ્તાફભાઈએ બળદેવભાઈ અને કાંતિભાઈ સાથે મળીને વજેપર ગામે સર્વે નંબર 318 પૈકી 1 ની ખાતેદાર રામજીભાઈ કાળાભાઈ દલવાડીના નામની જમીન ઠગાઈ કરવાના ઈરાદાથી બળદેવભાઈએ પોતાનું નામ રામજીભાઈ કાળાભાઈ દલવાડી તરીકેનું ધારણ કર્યું હતું અને ખોટું આધાર કાર્ડ, પાનકાર્ડ, ચૂંટણીકાર્ડ બનાવ્યું હતું અને ફરિયાદીને જમીનના સોદા માટે દયારામભાઈ અને મુકેશભાઈએ સાથે મળીને જમીનના સોદા પેટે ફરિયાદી પાસેથી 1,11,000 રૂપિયા પડાવી લીધા હતા અને આરોપીએ ખોટું આધાર કાર્ડ, પાનકાર્ડ, ચૂંટણીકાર્ડ બનાવીને તેનો ખરા તરીકે ઉપયોગ કરી બનાવટી દસ્તાવેજ ઊભા કરીને તેનો ખરા તરીકે ઉપયોગ કર્યો છે અને ફરિયાદી સાથે છેતરપિંડી કરેલ છે જેથી ભોગ બનેલ યુવાન દ્વારા ફરિયાદ નોંધવામાં આવતા પોલીસે ગુનો નોંધીને 6 પૈકીના 5 આરોપીઓને ઝડપી લીધા છે અને બાકીના આરોપીને પકડવા માટેની તજવીજ ચાલી ગઈ છે