વાંકાનેરના વઘાસીયા ટોલનાકે ટોલ ટેક્સ ભર્યા વગર ગાડી પસાર કરીને સ્ટાફને ફડાકા મારીને ધમકી આપનાર સામે ગુનો નોંધાયો

વાંકાનેર નજીક આવેલ વઘાસીયા ટોલનાકા પાસેથી થોડા દિવસો પહેલા રાત્રિના સમયે બોલેરો ગાડી લઈને પસાર થયેલા શખ્સે ટોલ ટેક્સ ભર્યા વગર બૂમ બેરીકેટને નુકસાન કરીને પોતાનું વાહન પસાર કર્યું હતું તેમજ ટોલ બુથના કર્મચારી સાથે માથાકૂટ કરીને ગાળો આપી હતી અને ફડાકા મારીને ધ્યાનથી મારી નાખવાની ધમકી આપી હતી. જેથી હાલમાં ટોલ પ્લાઝાના મેનેજર દ્વારા નોંધાવવામાં આવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.

મૂળ બિહારના રહેવાસી અને હાલમાં વાંકાનેરમાં આવેલ મિસરી હોટલની પાછળ સાઈનાથ એપાર્ટમેન્ટમાં રહેતા અને વઘાસીયા ટોલનાકા ખાતે મેનેજર તરીકે ફરજ બજાવતા મુકેશકુમાર નિર્ભયકુમાર સુધાંશુએ વાંકાનેર સીટી પોલીસ સ્ટેશન ખાતે વાહન નંબર જીજે 10 ટીવાય 0847 ના ડ્રાઇવર સંજયસિંહ ઝાલા રહે. વઘાસીયા વાળા સામે ફરિયાદ નોંધાવેલ છે જેમાં તેને જણાવ્યું છે કે ગત તા. 8/4 ના રોજ રાત્રિના 12:30 વાગ્યાના અરસામાં આરોપી પોતાના હવાલા વાળી બોલેરો ગાડી લઈને વઘાસીયા ટોલનાકા ખાતે ટોલ ભર્યા વગર ટોલ બૂથના બૂમ બેરીકેટને નુકસાન કરીને પસાર કરી હતી તેમજ ટોલ બુથના કર્મચારી સાથે બોલાચાલી કરી હતી અને જેમ ફાવે તેમ ગાળો આપી હતી અને ફડાકા મારીને જાનથી મારી નાખવાની ધમકી આપી હતી જેથી હાલમાં ટોલ પ્લાઝાના મેનેજર દ્વારા નોંધવામાં આવેલ ફરિયાદ આધારે પોલીસે ગુનો નોંધીને આરોપીને પકડવા માટે તજવીજ શરૂ કરેલ છે