માળીયા (મી) નજીક બંધ પડેલા ટ્રકની પાછળના ટ્રક અથડાતાં સર્જાયેલ અકસ્માતમાં એક ડ્રાઈવરનું મોત

માળીયા કંડલા નેશનલ હાઈવે રોડ ઉપર આવેલ હરીપર ગામથી આગળના ભાગમાં રસ્તા ઉપર બંધ પડેલા ટ્રકની પાછળના ભાગમાં બીજો ટ્રક અથડાયો હતો જેથી અકસ્માતનો બનાવ બન્યો હતો અને અકસ્માતના બનાવમાં જે ટ્રક અથડાયો હતો તેના ડ્રાઇવરને શરીરે ગંભીર ઇજાઓ થઈ હતી જેથી તેનું મોત નીપજ્યું હતું અને આ બનાવ સંદર્ભે હાલમાં બંધ પડેલા ટ્રકના ચાલકની ફરિયાદ લઈને પોલીસે મૃતકની સામે ગુનો નોંધી આગળની કાર્યવાહી હાથ ધરી છે

જામનગર જિલ્લાના જાલણસર ગામના રહેવાસી પંકજભાઈ અરજણભાઈ ગોંડલીયા (51)એ હાલમાં ટ્રક નંબર આરજે 19 જીજી 7364 ના ચાલક મૃતક દેવરામભાઈ છોગારામ દારા (30) રહે. રામપુરા રાજસ્થાન વાળાની સામે માળિયા તાલુકા પોલીસ સ્ટેશન ખાતે ફરિયાદ નોંધાવેલ છે જેમાં જણાવ્યું છે કે માળીયા કંડલા નેશનલ હાઈવે રોડ ઉપર આવેલ હરીપર ગામની આગળ સામખયારી તરફ એસ.એસ. સોલ્ટ નામના મીઠાના કારખાના સામેથી ફરિયાદી પોતાનો ટ્રક નંબર જીજે 12 બીવી 7191 લઈને પસાર થઈ રહ્યા હતા દરમિયાન તેનો ટ્રક ત્યાં બંધ પડી ગયો હતો તેવામાં પાછળના ભાગે મૃતક દેવરામભાઈ દારા પોતાનો ટ્રક લઈને આવી રહ્યા હતા અને તેણે પોતાનો ટ્રક ફરિયાદીના બંધ ટ્રકની પાછળના ભાગમાં અથડાવતા અકસ્માતનો બનાવ બન્યો હતો જે બનાવમાં દેવારામ દારાને શરીરે ઇજાઓ થઈ હતી જેથી તેનું મોત નિપજ્યું હતું જે બનાવ સંદર્ભે હાલમાં પોલીસે ફરિયાદ લઈને ગુનો નોંધી રાબેતા મુજબની કાર્યવાહી હાથ ધરી છે