પ્રેમ પ્રકરણનો કરૂણ અંજામ: ટંકારાના લજાઈ પાસે શ્રમિક યુવતી સાથે કૂવામાં ઝંપલાવનાર કારખાનેદારનું મોત

મોરબીના રવાપર રોડ ઉપર આવેલ શ્રીકૃષ્ણ એપાર્ટમેન્ટમાં રહેતા અને લજાઈ નજીક કારખાનું ધારવતા યુવાનને કારખાનામાં જ કામ કરતી યુવતીની સાથે પ્રેમ સબંધ હતો જો કે, તેઓ એક થઈ શકશે નહીં તેવા ડરના લીધે બંનેએ એક સાથે હડમતીયા રોડ ઉપર આવેલ કારખાનાની બાજુમાં કૂવામાં ઝંપલાવ્યું હતું ત્યારે પાણીમાં ડૂબી જવાના કારણે યુવાનનું મોત નીપજયું હતું જો કે, યુવતી પાણીમાંથી બહાર નીકળી ગયેલ હતી જેથી તેનો જીવ બચી ગયેલ છે અને આ બનાવની મૃતકના કારખાનાના ભાગીદાર દ્વારા ટંકારા તાલુકા પોલીસ સ્ટેશન ખાતે જાણ કરવામાં આવતા પોલીસે બનાવની નોંધ કરી આગળની કાર્યવાહી હાથ ધરી છે.

જાણવા મળતી માહિતી મુજબ મોરબીના રવાપર રોડ ઉપર આવેલ શ્રીકૃષ્ણ એપાર્ટમેન્ટ બ્લોક નંબર 201 માં રહેતા મહેશકુમાર મગનલાલ પાડલીયા (34) નામનો યુવાન તા 28/4 ના લજાઈ હડમતીયા રોડ ઉપર આવેલ સાર્થક પોલીક્લાસ કારખાનાની બાજુમાં આવેલ કૂવાના પાણીમાં ડૂબી ગયેલ હતો જેથી તેનું મોત નીપજયું હતું અને આ બનાવ અંગેની મૃતક યુવાનના કારખાનાના ભાગીદાર કેતનભાઇ અમૃતલાલ ફેફર (37) રહે. રવાપર રોડ વૈભવ લક્ષ્મી સોસાયટી રામેશ્વર એપાર્ટમેન્ટની બાજુમાં મોરબી વાળાએ ટંકારા તાલુકા પોલીસ સ્ટેશન ખાતે જાણ કરતા પોલીસે બનાવની નોંધ કરી આગળની કાર્યવાહી હાથ ધરી હતી.

આ બનાવ વિષે ટંકારા તાલુકા પોલીસ સ્ટેશનના પીઆઇ કે.એમ.છાસિયા સાથે વાત કરતાં તેમણે જણાવ્યુ હતું કે, મૃતક મહેશકુમાર મગનલાલ પાડલીયાનું લજાઈ નજીક કારખાનું આવેલ છે અને તેના કારખાનામાં કામ કરતી આદિવાસી યુવતી સાથે તેને પ્રેમ સબંધ હતો દરમ્યાન તે યુવતી ગઇકાલે સાંજે તેના કાકી સાથે ખરીદી કરવા માટે બાહર નીકળી હતી ત્યારે મૃતક યુવાન ત્યાં ગયો હતો અને ત્યાર બાદ બંને બાઇક ઉપર ત્યાંથી જતાં રહયા હતા અને બંને એક થઈ શકશે નહીં તેવા ડરના લીધે બંનેને એકીસાથે કૂવામાં ઝંપલાવ્યું હતું જો કે, મૃતક યુવાન પાણીમાં ડૂબી ગયો હતો જેથી તેનું મોત થયેલ છે અને યુવતી કોઈપણ રીતે કારખાનાની બહાર નીકળી ગયેલ હતી અને ત્યાર બાદ તેને નજીકના કારખાને જઈને આ ઘટનાની વાત કરી હતી જેથી મૃતક યુવાનના ભાગીદાર સહિતના લોકો ઘટના સ્થળે પહોચ્યા હતા અને આ બનાવની ટંકારા પોલીસે નોંધ કરીને આગળની કાર્યવાહી કરેલ છે.