મોરબીમાં મારી નાખવાની ધમકી આપીને ખંડણી માંગનારા શખ્સે યુવાનને ફરિયાદ પાછી ખેંચી લેવા ફોન ઉપર આપી ધમકી

મોરબીના શનાળા રોડ ઉપર આવેલ ગીતાંજલી એપાર્ટમેન્ટમાં રહેતા વેપારી યુવાન સાથે બોલાચાલી અને ઝઘડો કરીને માર માર્યો હતો અને ત્યાર બાદ વારંવાર માર મારવાનો ભય બતાવીને તેની પાસેથી સનાળા ગામના શખ્સ દ્વારા સમયાંતરે તેની પાસેથી કુલ મળીને 8.56 લાખનો મુદ્દામાલ પડાવી લેવામાં આવ્યો હતો જેથી કરીને યુવાને ફરિયાદ નોંધાવી હતી જે બાબતનો ખાર રાખીને યુવાનને ફરિયાદ પાછી ખેંચી લેવા માટે થઈને આરોપીએ ફોન ઉપર જેમ ફાવે તેમ ગાળો આપી હતી અને જાનથી મારી નાખવાની ધમકી આપી હતી જેથી ભોગ બનેલા યુવાને મોરબી એ ડિવિઝન પોલીસ સ્ટેશન ખાતે ફરિયાદ નોંધાવતા પોલીસે ગુનો નોંધીને આરોપીને પકડવા માટે તજવીજ શરૂ કરેલ છે.

જાણવા મળતી માહિતી મુજબ મોરબીના શનાળા રોડ ઉપર આવેલ ઉમિયા સર્કલ પાસે ગોકુલ મથુરા સોસાયટીમાં ગીતાંજલિ એપાર્ટમેન્ટ ફ્લેટ નંબર 402 માં રહેતા દેવકુમાર ચેતનભાઇ સોરીયા (21) નામના યુવાને એ ડિવિઝન પોલીસ સ્ટેશન ખાતે વિશાલ ઉર્ફે વિસલો વેલાભાઈ રબારી રહે.શનાળા વાળાની સામે ફરિયાદ નોંધાવેલ છે જેમાં તેણે જણાવ્યું છે કે, અગાઉ તેણે આરોપી સામે મોરબી એ ડિવિઝન પોલીસ સ્ટેશન ખાતે વિશાલ રબારી સહિત ચાર શખ્સોએ તેને માર માર્યો હોવાની અને મારનો ભય બતાવીને તેની પાસેથી રોકડ સહિત કુલ મળીને 8.56 લાખનો મુદ્દામાલ પડાવી લેવામાં આવ્યો છે અને ખંડણી માંગીને મારી નાખવાની ધમકી આપેલ છે તેવી ફરિયાદ કરી હતી જે ગુનામાં પોલીસે આરોપીઓની ધરપકડ કરીને જેલ હવાલે કર્યા હતા ત્યાર બાદ આ ફરિયાદનો ખાર રાખીને ફરિયાદ યુવાનને ફરિયાદ પાછી ખેંચી લેવા માટે થઈને આરોપીએ ફરિયાદીને ફોન કર્યો હતો અને ફોનમાં જેમ ફાવે તેમ ગાળો આપીને યુવાનને જાનથી મારી નાખવાની ધમકી આપવામાં આવી હતી જેથી ભોગ બનેલા યુવાને મોરબી એ ડિવિઝન પોલીસ સ્ટેશન ખાતે વિશાલ રબારી સામે વધુ એક ફરિયાદ નોંધાવવામાં આવતા પોલીસે ગુનો નોંધી આરોપીને પકડવા માટે તજવીક શરૂ કરી છે.