વાંકાનેરના દીઘલીયા ગામના બોર્ડ નજીક ઓવરટેક કરતાં સમયે ટ્રક ચાલકે બાઇકને હડફેટે લેતા વૃદ્ધનું મોત

વાંકાનેર તાલુકાના દીઘલીયા ગામના બોર્ડ પાસેથી પસાર થઈ રહેલા બાઇકને ટ્રક ચાલકે હડફેટે લેતા અકસ્માતનો બનાવ બન્યો હતો જેમાં ટ્રકના પાછળના ટાયરમાં આવી જવાના કારણે વૃદ્ધનું  મોત નીપજયું હતું. આ બનાવ સંદર્ભે મૃતકના દીકરાએ ફરિયાદ નોંધાવી છે જેના આધારે પોલીસે ટ્રક ચાલક સામે ગુનો નોંધી આરોપીને પકડવા માટે તજવીજ શરૂ કરી છે

જાણવા મળતી માહિતી પ્રમાણે વાંકાનેર તાલુકાના લાકડાધાર ગામે રહેતા કિશોરભાઈ છગનભાઈ અણીયારીયા (29)એ હાલમાં ટ્રક નંબર ટીએમ 29 સીવી 5087 ના ચાલક સામે વાંકાનેર તાલુકા પોલીસ સ્ટેશન ખાતે ફરિયાદ નોંધાવી છે જેમાં જણાવ્યું છે કે, વાંકાનેર તાલુકાના દીધલીયા ગામના બોર્ડ પાસેથી તેઓના પિતા છગનભાઈ માવજીભાઈ અણિયારીયા (70) બાઈક નંબર જીજે 3 એફજે 6076 લઈને જઈ રહ્યા હતા ત્યારે પાછળથી ટ્રક ચાલક તેના બાઈકનો ઓવરટેક કરવા જતા અકસ્માત થયો હતો અને ત્યારે ફરિયાદીના પિતા ટ્રકના પાછળના ટાયરમાં આવી જતાં તેનું મોત નીપજયું હતું અને અકસ્માતના બનાવ સંદર્ભે મૃતકના દીકરાએ નોંધાવેલ ફરિયાદ આધારે પોલીસે ટ્રક ચાલક સામે ગુનો નોંધી આરોપીને પકડવા માટે તજવીજ શરૂ કરી છે.