ટંકારાના વીરપર નજીક ટેન્કર પાછળ ટ્રક  અથડાતાં ટ્રક ડ્રાઈવરનું મોત: ગુનો નોંધાયો

ટંકારાથી મોરબી તરફ આવવાના રસ્તા ઉપર વીરપર નજીક ડિવાઇડરમાં વાવેલા વૃક્ષોને પાણી આપતા ટેન્કરની પાછળમાં ટ્રક અથડાયો હતો જે બનાવમાં ટ્રક ચાલકને શરીરે અને ગુપ્ત ભાગે ઇજા થયેલ હતી જેથી તેનું મોત નીપજયું હતું જે બનાવમાં મૃતકના પત્નીની ફરિયાદ લઈને પોલીસે ગુનો નોંધી આગળની રાબેતા મુજબની કાર્યવાહી હાથ ધરી છે.

બનાવી જાણવા મળતી માહિતી મુજબ મૂળ બિહારના રહેવાસી સુનિતાદેવી ગુડ્ડુરાય (38)ની ફરિયાદ લઈને પોલીસે તેના મૃતક પતિ ગુડ્ડુરાય શિવનાથરાય (44) સામે ગુનો નોંધી આગળી કાર્યવાહી હાથ ધરી છે જેમાં ફરિયાદીએ જણાવ્યું છે કે, તેઓના પતિ ટંકારાથી મોરબી તરફ આવવાના રસ્તા ઉપર વીરપર ગામ નજીક બા ની વાડી પાસેથી તેના હવાલા વાળો ટ્રક નંબર જીજે 3 એટી 3658 લઈને પસાર થઈ રહ્યા હતા ત્યારે રસ્તામાં ડિવાઈડરમાં વાવેલા વૃક્ષોને પાણી આપવા માટે થઈને ટેન્કર નંબર જીજે 12 1 એએમ 1889 જઇ રહ્યું હતું તેની પાછળના ભાગમાં ટ્રક અથડાવ્યો હતો જેથી આ અકસ્માતના બનાવમાં ફરિયાદીના પતિને શરીરે અને ગુપ્ત ભાગે ઇજાઓ થઇ હોવાથી તેનું મોત નીપજ્યું હતું. હાલમાં મૃતકના પત્નીની ફરિયાદ લઈને ટંકારા પોલીસે રાબેતા મુજબની કાર્યવાહી હાથ ધરી છે